26-нҗы хекая

Эйюп Худая вепалы галды

СУРАТДАКЫ яралы адама йүрегиң аваярмы? Онуң ады Эйюп. Янындакы онуң аялы. Онуң Эйюба нәме диййәнини билйәңми? «Худая гарга-да өл» диййәр. Ол нәме үчин бейле диййәркә? Эйюп нәме үчин яралыка? Гел, билели.

Эйюп Худая гулак асян вепалы адамды. Ол Кенгана голай ерлешйән Уц юрдунда яшаярды. Ехова Эйюбы говы гөрйәрди, йөне оны йигренйән хем барды. Кимкә?

Ол Шейтан Иблис. Ядыңда болса, Шейтан Ехованы йигренйән залым перишдеди. Шонуң үчин ол Адам ата билен Хов энәни Ехова гулак асмазлыга итерди. Шейле-де ол хемме адамлары Ехова гулак асмаз ялы эдип билерин дийди. Йөне ол максадына етдимикә? Ёк. Ядыңда болса, биз көп вепалы эркеклер ве аяллар барада окапдык. Шолар барада ойланып гөр. Сен оларың хайсысының адыны айдып билҗек?

Якуп билен Юсуп Мүсүрде өленден соң, ер йүзүнде Ехова иң вепалы адам Эйюпды. Ехова Шейтана хемме адамларың эрбетлик этмеҗегини гөркезмек иследи. Шонуң үчин ол Шейтана «Эйюба серет, ол маңа нәхили вепалы» дийди.

Шейтан: «Ол саңа вепалы, себәби сен оңа берекет хем байлык бердиң. Йөне байлыгыны ал, ол хем саңа гаргар» дийип, нәгилелик билдирди.

Шонда Ехова: «Онда нәме, сынанышып гөр. Онуң байлыгыны ал. Эйюба ислән задыңы эт. Гөрели, ол маңа гаргармыка. Йөне серет, оны өлдүрәйме» дийди.

Илки Шейтан адамлара Эйюбың сыгырларыны ве дүелерини огурлатды. Соңра гоюнларыны өлдүртди. Онсоң, түвелей Эйюбың он оглуны хем-де гызларыны өлдүрди. Соңра Шейтан Эйюбың өзүни-де шу элхенч кесел билен кеселлетди. Эйюп көп гөрги гөрди. Ине, шонуң үчинем Эйюбың аялы оңа: «Худая гарга-да өл» дийди. Йөне Эйюп бейле этмеди. Онсоңам, янына үч саны ялан досты гелип: «Өң эрбет иш эденсиң» дийдилер. Эмма Эйюп шонда-да Худая вепалы галды.

Ехова муңа өрән бегенди. Суратда гөршүң ялы, Эйюба берекет берди. Ехова оны сагалтды. Эйюбың ене-де он саны чагасы болды. Сыгырлары, гоюнлары ве дүелери болса өңкүден-де ики эссе көпелди.

Сен Эйюп ялы Ехова хемише вепалы болармың? Вепалы галсаң, Ехова саңа-да пата берер. Бүтин ер йүзи Эрем багы ялы боланда, сен бакы яшап билерсиң.

Эйюп 1:1—22; 2:1—13; 42:10—17.