Makani 26: Jobu Ulasyomeka Kuli Leza
HENA takweetezyi muntu ooyu uuciswa? Izina lyakwe ngu Jobu, alimwi ooyu mukaintu, mukaintu wakwe. Hena ulicizyi ncaamba kuli Jobu? Ulati: ‘Mutukile Leza kutegwa ufwe.’ Atubone cimupa kwaamba boobu mukaintu alimwi ancapengela boobu Jobu.
Jobu wakali muntu uusyomeka uuswiilila Jehova. Wakali kukkala ku Uzi kufwiifwi aku Kenani. Jehova wakali kumuyanda kapati Jobu, pele kwakali muntu umwi wakamusulide. Hena ulimuzyi?
Wakali Saatani Diabolosi. Koyeeya kuti Saatani mungelo mubi uusulide Jehova. Wakapa kuti Adamu a Eva bamuzangile Jehova. Alimwi wakali kuyeeya kuti ulakonzya kupa kuti bantu boonse bamuzangile Jehova. Pele hena wakacikonzya? Peepe. Koyeeya buyo basankwa abamakaintu banji basyomeka mbotwaiya. Ino bali bongaye mbokonzya kuyeeya?
Jakobo a Josefa nibakafwa mu Ijipiti, Jobu ngomuntu wakali kwiinda kusyomeka kuli Jehova nyika yoonse. Jehova wakali kuyanda kuti Saatani azyibe kuti takonzyi kucinca bantu boonse kuba babi, aboobo wakati: ‘Mulange Jobu. Langa mbwasyomeka kuli ndime.’
Saatani wakazya wati: ‘Tee ulasyomeka akaambo kakuti wamuleleka alimwi ulijisi lubono lunji. Pele kuti wamunyanga lubono oolu, ulakonzya kukutukila.’
Aboobo Jehova wati: ‘Kocita mboyanda. Munyange zyoonse. Kufwumbwa ncoyanda kucita kuli Jobu inga wacita. Tulabona naa ulanditukila. Pele utamujayi.’
Cakutaanguna, Saatani wapa kuti bantu babbe ŋombe ankamela zya Jobu alimwi mbelele zyakwe zyajaigwa. Amane wajaya bana ba Jobu bali 10 basankwa abasimbi kwiinda mukubelesya muwo. Kumane Saatani wamuletela Jobu bulwazi bukatazyide. Jobu wakapenga kapati. Nkakaambo kaako mukaintu wakwe ncaakamwaambila kuti: ‘Mutukile Leza kutegwa ufwe.’ Pele Jobu tanaakamutukila. Kumane kwakaboola balongwe bakwe basilweeno botatwe bati, kuli ncowakacita ncocisilwa boobu. Pele Jobu wakazumanana kusyomeka.
Eeci cakamukonda Jehova, eelyo wakamuleleka Jobu kweelana ambobona acifwanikiso. Wakamuponya. Jobu wakaba abana bambi bali 10 ibabotu, aŋombe ambelele ankamela zyakayungizyigwa ziindi zyobilo kwiinda nzyaakajisi.
Hena lyoonse una kusyomeka kuli Jehova mbuli Jobu? Ikuti kosyomeka, Leza uya kukuleleka anduwe. Uya kukonzya kupona kukabe akutamani nyika yoonse yaakubota mbuli bwakali muunda wa Edeni.
Jobu 1:1-22; 2:1-13; 42:10-17.
Mibuzyo
- Ino Jobu wakali ni?
- Ncinzi Saatani ncaakali kusoleka kucita, pele hena wakazwidilila?
- Ncinzi Jehova ncaakamuzumizya Saatani kucita, alimwi nkaambo nzi?
- Nkaambo nzi mukaintu wa Jobu ncaakamwaambila Jobu kuti ‘amutukile Leza kutegwa afwe’? (Bona acifwanikiso.)
- Mbuli mbokonzya kubona acifwanikiso cabili, mbuti Jehova mbwaakamuleleka Jobu, alimwi nkaambo nzi?
- Ikuti swebo katusyomeka kuli Jehova mbuli Jobu, nzileleko nzi nzyotuya kutambula?
Mibuzyo aimwi
- Bala Jobu 1:1-22.
Mbuti Banakristo sunu mbobakonzya kumwiiya Jobu? (Job. 1:1; Flp. 2:15; 2 Pita 3:14)
- Bala Jobu 2:1-13.
Muunzila nzi zyobilo ziindenyi Jobu amukaintu wakwe mbobakacita kukupenzya kwa Saatani? (Job. 2:9, 10; Tus. 19:3; Mik. 7:7; Malk. 3:14)
- Bala Jobu 42:10-17.
Nkukozyanya kuli buti kuliko akati kazyilongezyo Jobu nzyaakatambula alimwi azyeezyo Jesu nzyaakatambula akaambo kakuliyumya mubuumi? (Job. 42:12; Flp. 2:9-11)
Ncinzi ncotukulwaizyigwa twalanga zilongezyo Jobu nzyaakatambula kuli Leza akaambo kakusyomeka? (Job. 42:10, 12; Heb. 6:10; Jak. 1:2-4, 12; 5:11)
