¡JEL ajula sbʼaj ja ala winik jaw bʼutʼel kʼoʼoni! Sbʼiʼil Job, sok ja ixuki ja xcheʼumi. ¿Wan maʼ xa naʼa jas wan yaljel yabʼ ja Job? «Taʼa tiʼal kistal ja Dyosi sok chamanxa ele.» La kiltik jas yuj ja yeʼn yala jun jasunuk jastal jaw, sok jas yuj ja Job jel yiʼaj wokol.

Job jun winik toj sok kʼuʼabʼal ajyi soka Jyoba. Ja yeʼn ti ajyi kulan bʼa slujmalil Uz, mi jel najatuk yiʼoj ja Canaán. Jyoba jel syajtay ja Job, pe ayni june maʼ jel x-ilji yuj kontra. ¿Wan maʼ xa naʼa machunkiluka?

Yeʼn ja Satanás ja Dyablo. Ajuluk akʼujol, ja Satanás, ja anjel mi lekuk ja skʼujoli, it maʼ wa skontraʼan ja Jyoba. Yeʼn ja maʼ skʼulan ja Adán sok ja Eva a-skʼok-e ja smandar ja Jyoba, chomajkil ja yeʼn wa spensaraʼan ajyi spetsanil ja ixuk winik ojni skʼok-e ja smandar ja Dyosi. Pe ¿bʼobʼ maʼ yuj ja jaw? Miyuk. Kechan ochan pensaraʼan ja janekʼ jnebʼunejtikxa sbʼaja ixuk winik toj ajyiye soka Dyosi. ¿Oj maʼ bʼobʼa ta tiʼal jujuntik bʼa yeʼnle?

Tsaʼan yajni Jacob soka José chamye ja bʼa Egipto, bʼa spetsanil ja Luʼumi ja Job yeʼn waj ja winik mas toj ajyi sok ja Dyosi. Jyoba wani skʼana oj ya snaʼ ja Satanás mini oj chʼak bʼobʼ yuj skʼulajel ja ixuk winiki a-skʼuluke ja jas mi lekuki, sok yala yabʼ: «Kʼela ja Job. Kʼela jastal ja yeʼn tojxta ni ay jmoka».

Ti yala ja Satanás: «Ja yeʼn tojxta ni aya moka, pe ja yuj ja weʼn waxa wayi slekilal soka jastik wa skʼulan ja skʼabʼi sok yuja jel ja sjastik sbʼaji. Pe ta japa yi spetsanil ja jastik yiʼoji, ojni kʼe kʼumanukabʼaj kistal».

Jyoba ti yalaʼa: «Kaʼax. Chʼakan japa yi. Kʼulan yi spetsanil ja jas waxa kʼana. Ti oj kiltik ta oj kʼe kʼumanuk jbʼaja. Kechan moka mile».

Bʼajtan, ja Satanás skʼulan jujuntik winik awaj yelkʼane ja swakax sok ja skameyo jumasaʼ ja Job, sok ja xchejiki chʼak miljuk yi. Smila yi ja lajune yuntikil bʼa jun tsatsal ikʼ. Tsaʼan, ja Satanás ya koʼ sbʼaj ja kistal chamel it ja Job. Jelni yiʼaj wokola, ja yuj ja xcheʼumi yala yabʼ: «Taʼa tiʼal kistal ja Dyosi sok chamanxa ele». Pe ja Job mini skʼulana. Chomajkil, jakye oxe winik wa xya ekʼ sbʼaje jastal yamigo ja Job sok yalawe yabʼ ja yeʼn ay jas skʼulunej nakʼul bʼa mi lekuk. Pe ja Job tojni ajyi soka Dyosa.

Ja it jel ya gustoʼaxuk ja Jyoba, sok tsaʼan ja yeʼn ya koʼ slekilal ja Job, jastal waxa wila bʼa dibujo. Ya tojbʼuk soka chamel yiʼoji. Ajyi pilan lajune yuntikil jel tsamalik. Ajyi chabʼ ekʼele mas ja xchanteʼiki, ja xcheji sok ja skameyoʼiki.

¿Oj maʼ ajyan toj sok ja Jyoba ja jastalni ajyi ja Job? Ta jachʼ kʼa, ja Dyos ojni yawi alekilala. Oj bʼobʼa ta wa sakʼanil bʼa tolabida ja bʼa tsamal Luʼum yajni xpax jun tsamal kʼachinubʼ ja jastal ajyi bʼa Edeni.