¿NI LAKGALHAMANA uma tatatla? Xtukuwani uma chixku Job, chu uma tiku lakgaya wa xpuskat. ¿Katsiya wix tuku wanima? Lixkajni kawani Dios chu kanit. Kaʼakxilhwi tuku xlakata wanilh tama tachuwin, chu tuku xlakata lu xpatinama Job.

Job nikxni xmakgxtakga Jehová chu xkgalhakgaxmatniy. Xla xlama anta kachikin xwanikan Uz, lakatsu kCanaán. Jehová lu xpaxkiy Job, pero xlama tiku ni xʼakxilhputun. ¿Katsiya wix tiku tama tiku ni xakxilhputun?

Wa tama Satanás Diablo. Kalakapastakti, uma ángel wa tiku lixkajni likatsiy ni akxilhputun Jehová. Tama Diablo tlan kamatlawilh pi Adán chu Eva ni nakgaxmatnikgoy Jehová, chu xlakpuwan pi na tlan natlaway pi putum kristianos ni nakgalhakgaxmatnikgoy Dios. Pero, ¿matlanilh chuna nakamatlawiy? Ni. Kaj kalakapastakti, lhuwa lakpuskatin chu lakchixkuwin tiku ni makgxtakgkgolh Dios nema katsinitawa. ¿Niku kgalhlit lakapastaka xtukuwanikan?

Akxni xninitta Jacob chu José kʼEgipto, nitiku xlama xlikalanka Katiyatni a chatum la Job, xla nixmakgxtakga Jehová. Jehová xlakaskin nakatsiy Satanás pi nilay xtlaway pi putum kristianos lixkajni nalikatsikgoy chu wanilh: Kaʼakxilhti Job. Xla nikimakgxtakga.

Satanás wan: Job nimakgxtakgan xlakata wix sikulanatlawaya chu katuwa tuku xatlan maxkiya. Kamakglhti tuku kgalhi chu lixkajni nawaniyan.

Wa xlakata Jehová wanilh: Kapit. Kamakglhti tuku kgalhiy. Katlawani tuku nitlan natlawaniputuna. Naʼakxilhaw komo lixkajni nakiwaniy. Pero kuenta natlawaya nitimakgniya.

Pulana, Satanás tlawalh pi makgapitsi lakchixkuwin namakgkgalhankgoy xtoro chu xcamello, chu putum kamakgnika xborrego. Chu kalimakgnilh lanka un kgalhkaw xlaktsuman chu xlakgkgawasan. Alistalh, limatatatlilh uma tajatat. Job lu snun patinalh. Wa xlakata xpuskat wanilh: Lixkajni kawani Dios chu kanit. Pero Job ni chuna tlawalh. Na minkgolh kgalhtutu tiku nixaxlikana xʼamigo xwankgonit chu wanikgolh pi wi tuku nitlan xtlawanit. Pero Job nikxni makgxtakgli Dios.

Uma lu makgapaxuwalh Jehová, chu alistalh Jehová maxkilh tasikulunalin, chuna la akxilhpat kdibujo. Mapaksalh chu kgalhipa a kgalhkaw lu xalakswan xkamanan, chu maxkipa tlakg tanlhuwa toros, borregos chu camellos nixawa la xkgalhiy xapulana.

Chu wix, ¿na nikxni katimakgxtakgti Jehová chuna la Job? Komo chuna natlawaya, Dios na namaxkiyan xtasikulunalin. Akxni Katiyatni xastlan nawan la xakalipaxaw xwanit Edén, wix tlan anta nalatapaya chu nikxni naniya.