NOHURRA nosalirwa habwa omusaija omurwaire ogu? Ibara lye nuwe Yobu, n’omukazi ogu nuwe nyinabwenge we. Nomanya ekyarukugambira Yobu? ‘Kyena Ruhanga ofe.’ Katurole habwaki yagambiire ati Yobu kandi habwaki Yobu yaboineboine ati muno.

Yobu akaba ali musaija mwesigwa kandi akaba nayorobera muno Yahwe. Yaikaraga omunsi ya Uzi ekikaba kitali hara na Kanani. Yahwe yagonzaga muno Yobu, baitu hakaba haroho omuntu ondi akaba atarukumugonza. Nomumanya?

Onu nuwe Setani Diabolo. Ijuka, Sitani nuwe maraika omubi arukunobera kimu Yahwe. Nuwe yareterize Adamu na Hawa obutorobera Yahwe kandi akaba natekereza ngu nasobora kujemesa abantu boona kubaiha hali Yahwe. Kinu akakisobora? Nangwa. Ijuka abasaija n’abakazi abesigwa abatwayegereho. Nibaingaha ab’orukwijuka amabara gabu?

Hanyuma y’okufa kwa Yakobo na Yusufu omu Misiri, Yobu nuwe akaba nakirayo kuba mwesigwa omu nsi yoona. Yahwe akagonza kukyoleka Setani ngu tarukusobora kufoora abantu boona kuba babi, hanyuma akamugambira: ‘Dora Yobu. Norora nkoku arukunyesiga?’

Setani akahakana: ‘Ni mwesigwa habwokuba omuhaire omugisa kandi aine ebintu ebirungi bingi. Kakuba obimwihaho, naija kukwehakana.’

Hanyuma Yahwe akamugambira ati: ‘Genda omumaiso obimwiheho. Omukole kyona ekibi ekyoragonza. Turore obu aranyehakana. Baitu otamwita.’

Okubanza, Sitani akaleta abasaija baiba ente zoona n’engamira eza Yobu, kandi entaama ze zoona baziita. Hanyuma yaita abaana ba Yobu 10 aboojo n’abaisiki omu ihunga lyamani. Hanyuma ya byoona Sitani akarwaza Yobu oburwaire bw’amaani muno. Yobu akabonabona muno. Nahabwekyo nuho mukazi wa Yobu yarugirire kugamba iba ati: ‘Wehakane Ruhanga ofe.’ Baitu Yobu akaba atarukusobora kukora ekintu nkeki. N’abanywani be ab’obugobya bakaija bamugambira ngu akaba ali w’engeso mbi muno mubwomezi bwe. Baitu Yobu akasigara mwesigwa.

Kinu kikasemeza muno Yahwe, hanyuma akaha Yobu omugisa nkoku orukurora omukisisani. Akamukiza oburwaire bwoona. Yobu akatunga abaana bandi 10 abaali barungi muno. Ruhanga akamuha ente, entaama, engamira enungi emirundi ebiri.

Naiwe oraikaraga oli mwesigwa hali Yahwe nkoku Yobu yakozire? Kakuba okikora, Ruhanga naija kukuha emigisa. Olisobora kwomera ebiro n’ebiro omu nsi obwerifooka nk’orugonjo rwa Adeni.