БО аарыг эр кижи сеңээ кээргенчиг-дир бе? Ооң адын Ио́в дээр, а бо херээжен кижи — ооң кадайы-дыр. Ио́вка ол чүнү чугаалап турарын, билир сен бе? ‘Бурганны каргапкаш, өлү бер’,— дээн. Ооң чүге ынча деп чугаалаанын база Ио́в чүге мынчаар коргунчуг хилинчектенип турарыл, билип алыылам.

Ио́в Бурганга шынчы база дыңнангыр кижи чораан. Ол Ханаа́ндан ырак эвесте, Уц деп черге чурттап турган. Иегова Ио́вка аажок ынак, ынчалза-даа Ио́вту көөр хөңнү чок кым-бир бар турган. Кымыл ол, билир сен бе?

Нүгүлчү Эрлик-тир. Сактыр-дыр сен бе, Эрлик — дээрге Иегованы көөр хөңнү чок, дээрниң каржы төлээзи-дир. Ада́м биле Е́ваны Иеговага дыңнангыр эвес болурунче ол ыдалапкан, база ол ышкаш Иеговага дыңнангыр эвес болурунче шупту кижилерни албадап шыдаар мен деп бодаан. Ынчалза-даа бо чүүл чедиишкинниг болган бе? Чок. Бистиң таныжып алган хөй шынчы эр болгаш херээжен кижилерниң дугайында чүгле бодап көр даан. Оларның кайызының адын адап шыдаар сен?

Еги́петке Иа́ков биле Ио́сиф мөчээн соонда, чер кырынга Иеговага эң шынчы кижи Ио́в турган. Шупту кижилерни багай болурунче Эрлик албадап шыдавазын билзин деп, Иегова күзеп турган, ынчангаш ол Эрликке чугаалаан: ‘Ио́вче көрем. Кайы-хире меңээ шынчы-дыр, көр даан’.

— Сен ону йөрээп турар бооруңга, база ооң өнчү-хөреңгизи хөй боорга, ол сеңээ шынчы-дыр. Ынчалза-даа ооң өнчү-хөреңгизин аппаар болзуңза, ол сени каргаптар,— деп, Эрлик удурланган.

Ынчан Иегова чугаалаан: ‘Че харын, шенеп көр, че. Ооң өнчү хөреңгизин алгаш бар. Ио́вка күзээр чүүлүңнү шуптузун кылып болур сен. Ол мени каргаптар бе — көрүп көрээли. Көрдүң бе, чүгле ону өлүрбес сен’.

Баштай Эрлик Ио́втуң инектерин база тевелерин оорлаарынче кижилерни ыдалапкан, оон ооң хойларын узуткап каапкан. Оон Ио́втуң 10 оолдарын болгаш уругларын казыргы-биле өлүргеш, сөөлүнде Ио́вче бо коргунчуг аарыгны халдадыпкан. Ио́в дыка хилинчектенип турган. Ынчангаш Ио́втуң кадайы аңаа мынча дээн: ‘Бурганны каргапкаш, өлү бер’. Ынчалза-даа Ио́в ону кылырын күзевээн. Оон аңгыда, ооң үш меге эштери келгеш, ооң мурнунда шын эвес чурттап турган сен дээн. Ынчалза-даа Ио́в ынчан безин шынчы арткан.

Иегова ол дээш дыка өөрээн, бо чурукта көрүп турарың ышкаш, ол сөөлүнде Ио́вту йөрээген. Ол ону аарыгдан эмнеп каан. Ио́в 10 чараш ажы-төлдүг апарган, а инектери, хойлары база тевелери ооң мурнунда бодаарга, ийи катап хөй болу берген.

Сен, Ио́в ышкаш, Иеговага кажан-даа шак ынчаар шынчы болур сен бе? Бир эвес ийе болза, ынчан Иегова сени база ынчалдыр йөрээр. Бүгү чер Эде́м сады ышкаш кайгамчык чараш апаарга, сен мөңге чурттаар аргалыг болур сен.