OVE hẽ o kuete ohenda lomunu o kasi ndeti oku vela? Onduko yaye Yovi kuenda eye o kasi lukãi waye. Nye ukãi waco a kasi loku sapuila Yovi? Eye o kasi loku sapuila Yovi hati: ‘Siñala Suku yove oco o fe.’ Tu konomuisi esunga lieci ukãi waco a popela olondaka evi. Tu konomuisivo esunga lieci Yovi a talela ohali.

Yovi wa kala ulume umue ukuesunga haeye wa enda loku pokola ku Yehova. Eye wa kala kofeka yo Usi ocipepi lofeka yo Kanana. Yehova wa solele calua Yovi. Pole kua kala umue wa suvukile Yovi. Ove hẽ wa kũlĩha omunu waco?

Omunu waco Satana Eliapu. Satana eye ungelo ũvi wa suvukile Yehova. Eye wa kuata uloño woku vetiya Adama la Heva oco va lueye ocihandeleko ca Suku. Omo liaco, wa simile okuti o pondola oku ci linga lomanu vosi. Pole ka ci tẽlele. Etu tua lilongisa eci catiamẽla komanu valua alume lakãi vakuekolelo. Vañami ove wa kũlĩha?

Noke yokufa kua Yakoba la Yosefe kofeka Yegito, Yovi eye lika wa kala omunu ukuesunga kovaso a Yehova. Yehova wa yonguile oku vetiya Satana oku limbuka okuti eye ka tẽla oku vetiyila omanu vosi koku linga eci cĩvi. Eye wo sapuila hati: ‘Wa limbuka ukuenje wange Yovi okuti ukuesunga?’

Satana wa kumbulula Yehova hati: ‘Yovi o kasi loku lekisa ekolelo omo liasumũlũho a tambula kokuove kuenje eye o kuete ovina vialua viwa. Pole nda ove wo upa ovina viaco, eye oku siñala.’

Yehova wa popia la Satana hati: ‘Kuende upa ovina viosi via Yovi. Linga ovina viosi vĩvi o yongola kokuaye oco tu limbuke nda eye o ndi siñala. Pole ku ko ponde.’

Tete Satana wa vetiya omanu oku nyana oviunda violongombe lolongamelo kuenda oku ponda olomeme viosi via Yovi. Noke wa ponda locipepe cinene omãla valume lomãla vafeko va Yovi va soka ekũi. Oku sulako Satana wa veta Yovi luvei umue ũvi. Yovi wa tala ohali yalua. Eli olio esunga lieci ukãi waye a popela hati: ‘Siñala Suku oco o fe.’ Pole Yovi ka tavele kondaka yaco. Handi vali, akamba vaye vatatu veyavo oku popia okuti wa kala loku tala ohali omo liovina vĩvi a lingaile. Pole Yovi wamamako lekolelo liaye.

Yehova wa sanjukile calua kuenje noke weya oku sumũlũisa Yovi ndomo o ci lete vociluvialuvia cilo. Yehova wo sakula okuvela kuaye. Yovi weya oku kuata vali ekũi komãla va posoka. Eye weyavo oku kuata oviunda vialua violongombe lolomeme kuenda olongamelo okuti vina a kuatele tete vi sule.

Anga hẽ ove okamamako oku lekisa ekolelo ku Yehova ndeci Yovi a linga? Nda wa ci linga, Yehova o ka ku sumũlũisa. Ove oka kala otembo ka yi pui voluali luokaliye.