Nganea 26: Yobo u a Fulufhedzea kha Mudzimu
Naa uyu munna a lwalaho ni a mu pfela vhuṱungu? U pfi Yobo, nahone a re phanḓa hawe ndi musadzi wawe. Ni a ḓivha uri u ri mini kha Yobo? ‘Sema Mudzimu u fe.’ Kha ri vhone uri ndi ngani a tshi nga amba ngauralo, na uri ndi ngani Yobo o ṱhuphea ngauralo.
![Yobo u na zwilonda](https://assetsnffrgf-a.akamaihd.net/assets/l/my/my_VE/26.jpg)
Yobo o vha e munna a fulufhedzeaho kha Yehova. O vha a tshi dzula shangoni ḽa Utsi, hu si kule na Kanana. Yehova o vha a tshi funesa Yobo, fhedzi ni a ḓivha uri o vha a tshi vhengwa nga nnyi?
Nga Sathane Diabolo. Humbulani, Sathane ndi muruṅwa muvhi a vhengaho Yehova. O kona u ita uri Adamu na Eva vha si thetshelese Yehova, nahone o humbula uri a nga ita uri muṅwe na muṅwe na ene a si thetshelese Yehova. Fhedzi naa o zwi kona? Hai. Humbulani vhanna na vhasadzi vhanzhi vha fulufhedzeaho vhe ra guda nga havho. Ni nga bula vhangana?
Yakobo na Yosefa vho no fa Egipita, Yobo o vha e muthu a fulufhedzeaho zwihulu kha ḽifhasi ḽoṱhe. Yehova o ṱoḓa uri Sathane a ḓivhe uri a nga si ite uri vhoṱhe vha vhe vhavhi, ngauralo a ri: ‘Vhona Yobo. Vhona uri u fulufhedzea hani kha nṋe.’
Sathane a pikisa: ‘U a fulufhedzea, ngauri u mu fha zwithu zwinzhi zwavhuḓi. Fhedzi arali wa mu dzhiela, u ḓo u sema.’
Ngauralo Yehova a ri: ‘Iya u zwi dzhie. Ita zwithu zwoṱhe zwivhi zwine wa funa kha Yobo. Ri ḓo vhona arali a tshi ntsema. Fhedzi u songo mu vhulaha.’
Tsha u thoma, Sathane a ita uri vhanna vha tswe kholomo dza Yobo na dzikamela, na nngu dzawe dza vhulawa. Zwenezwo Sathane a vhulaha vharwa vhawe vha 10 na vhananyana nga ḓumbu. A konou rwa Yobo nga uvhu vhulwadze vhu ofhisaho. Ndi nga hone musadzi wawe o mu vhudza: ‘Sema Mudzimu u fe.’ Na khonani tharu dza mazwifhi dza ri o vha o tshila vhutshilo vhuvhi. Fhedzi Yobo a ḓi fulufhedzea.
Izwi zwa takadza Yehova, nahone nga murahu a fhaṱutshedza Yobo, samusi ni tshi nga zwi vhona tshifanyisoni. A mu fhodza vhulwadze. Yobo a vha na vhaṅwe vhana vha 10 vha u naka, na kholomo nnzhi dzi fhiraho dza u thoma, nngu na dzikamela.
Naa ni ḓo ḓi fulufhedzea kha Yehova sa Yobo? Arali no ralo, Mudzimu u ḓo ni fhaṱutshedza-vho. Ni ḓo kona u tshila nga hu sa fheli musi ḽifhasi ḽo itwa ḽa nga tsimu ya Edeni.
Yobo 1:1-22; 2:1-13; 42:10-17.
![Yobo na muṱa wawe.](https://assetsnffrgf-a.akamaihd.net/assets/l/my/my_VE/26a.jpg)
Mbudziso
- Yobo o vha e nnyi?
- Sathane o lingedza u ita mini, fhedzi naa o zwi kona?
- Mudzimu o tendela uri Sathane a ite mini, nahone ndi ngani?
- Ndi ngani musadzi wa Yobo o amba uri ‘sema Mudzimu u fe?’ (Sedzani tshifanyiso.)
- Samusi ni tshi khou zwi vhona kha tshifanyiso tsha vhuvhili, Yehova o fhaṱutshedza hani Yobo, nahone ndi ngani?
- Arali riṋe, u fana na Yobo, ri tshi fulufhedzea kha Yehova, ri ḓo wana phaṱhutshedzo dzifhio?
Mbudziso dzo engedzeaho
- Vhalani Yobo 1:1-22.
Ṋamusi Vhakriste vha nga edzisa hani Yobo? (Yobo 1:1; Vha-Fil. 2:15; 2 Pet. 3:14)
- Vhalani Yobo 2:1-13.
Yobo na musadzi wawe vho aravha hani nga nḓila mbili dzo fhambanaho musi vha tshi khou tovholwa nga Sathane? (Yobo 2:9, 10; Mir. 19:3; Mixa 7:7; Mal. 3:14)
- Vhalani Yobo 42:10-17.
Ndi u fana hufhio hune ha vha hone vhukati ha malamba e Yobo a a wana na zwe Yesu a zwi wana nga u dzula a tshi fulufhedzea vhutshiloni hawe hoṱhe? (Yobo 42:12; Vha-Fil. 2:9-11)
Ri ṱuṱuwedzwa hani nga phaṱutshedzo dze Yobo a dzi wana nge a dzula a tshi fulufhedzea kha Mudzimu? (Yobo 42:10, 12; Vha-Heb. 6:10; Yak. 1:2-4, 12; 5:11)