HA SAHETTIYA bitanee nena qarettennee? A sunttay Iyyooba; qassi ha maccaasiyaa a machchiyo. Iyyoobayyo a woygaydda deˈiyaakko eray? ‘Xoossaa qanggada hayqqaaga’ yaagausu. O hegaa malabaa giissiday aybakkonne qassi, Iyyoobi hegaa keenaa aybissi tuggattidaakko ane beˈoos.

Iyyoobi Yihoowayyo azzazeti deˈida ammanettida asa. I deˈidoy, Kanaaneppe daronne haakkenna Uuxa giyo biittaana. Yihooway Iyyooba keehippe siiqees shin, a ixxiya issi uri deˈees. I oonakko eray?

I Seexaanaa Dablloosa. Seexaanay, Yihoowa ixxiya iita kiitanchcha gidiyoogaa hassaya. I Addaamanne Hewaano Yihoowassi azazettennaadan oottana danddayiis; qassi oonakka gidin Yihoowassi azazettennaadan oottana danddayiyaadan qoppiis. SHin hegaa oottana danddaydee? CHii, danddaybeenna. Nuuni etabaa tamaarido ammanettiya daro attumaasatanne maccaasata ane qoppa. Etappe aappunatu sunttaa hassayay?

Yaaqoobinne Yooseefi Gibxxen hayqqogaappe guyyiyan, kumetta saˈan ooppenne aadhdhidi Yihoowassi ammanettidi deˈida asi Iyyooba. Seexaanay asa ubbaa iita gidanaadan oottanau danddayennaagaa i eranaadan, Yihooway a hagaadan giis: ‘Iyyooba beˈa. I taassi ay keena ammanettida asakko xeella’ yaagiis.

Seexaanay: ‘I neessi ammanettida asa gidana danddayidoy, neeni a anjjido gishshataassanne assi daro loˈˈobay deˈiyo gishshataassa. SHin hegaa ubbaa neeni xayssikko, i nena qanggana’ yaagidi palamettiis.

Hegaa gishshau Yihooway: ‘Ba; baada assi deˈiyaabaa xayssa. Iyyooba bolli gakkanaadan neeni koyido iitaba ubbaa ootta. I tana qanggiyaakko aggiyaakko ane beˈana. SHin a worenna mala’ yaagiis.

Seexaanay koyro, Iyyooba dorssati hayqqanaadaaninne asay a mehetanne gaameelata wuuqqanaadan oottiis. Hegaappe guyyiyan, a attumanne macca naata 10 gotiyan woriis. Kaallidi, Seexaanay Iyyooba ha iita harggiyan sahettanaadan oottiis. Iyyoobi keehippe tuggatiis. Iyyooba machchiyaa: ‘Xoossaa qanggada hayqqaaga’ yaagidoy hegaassa. SHin Iyyoobi hegaadan oottibeenna. Qassi, heezzu worddo laggeti yiidi, neeni kase iitabaa oottadasa yaagidosona. SHin Iyyoobi ammanettiya asa gidiyoogaa aggibeenna.

Hegee, Yihoowa keehippe ufayssiisinne misiliyan neeni beˈana danddayiyoogaadan, guyyeppe i Iyyooba anjjiis. Yihooway harggiyaappe a pattiis. Iyyoobi hara 10⁠u mera loˈˈo naata yeliis; qassi kaseegaappe naaˈˈu kushe dariya mehiyaa, dorssaanne gaameelaa haariis.

Iyyoobadan Yihoowassi ubbatoo ammanettiyaagaa giduutee? Ammenettiyaagaa gidikko, Xoossay nenakka anjjana. Kumetta saˈay Edene ataakiltte sohuwaadan loˈˈiyaasa gidiyo wode neeni merinau deˈana danddayaasa.