NALOLOOY ka ba hini nga masakit nga tawo? Job an iya ngaran, ngan ini nga babaye, asawa niya. Maaram ka ba kon ano an ginsisiring niya kan Job? ‘Isalikway an Dios basi mamatay ka na.’ Aton kitaon kon kay ano nga ginyakan ito han iya asawa, ngan kon kay ano nga duro an pag-antos ni Job.

Hi Job matinumanon ngan masinugtanon kan Jehova. Naukoy hiya ha Us, hirani ha Kanaan. Hinigugma gud ni Jehova hi Job, kondi may-ada usa nga nasisina ha iya. Maaram ka ba kon hin-o?

Hi Satanas nga Yawa. Hinumdumi nga hi Satanas an maraot nga anghel nga nasisina kan Jehova. Nasulay niya hira Adan ngan Eva nga diri sumugot kan Jehova, ngan naghunahuna hiya nga masusulay liwat niya an ngatanan basi magtalapas. Kondi nahimo ba niya ito? Waray. Hunahunaa la an damu nga matinumanon nga kalalakin-an ngan kababayin-an nga aton hinbaroan. Hin-o an imo nahinunumdoman?

Katapos mamatay hira Jakob ngan Jose ha Ehipto, hi Job an pinakamatinumanon nga tawo kan Jehova ha bug-os nga tuna. Karuyag ni Jehova nga mahibaro hi Satanas nga diri niya masusulay an ngatanan nga magin maraot, salit hiya nagsiring: ‘Kitaa hi Job, matinumanon gud hiya ha akon.’

‘Matinumanon hiya tungod kay imo hiya ginbibendisyonan ngan gintatagan hin damu nga mag-opay nga butang,’ siring ni Satanas. ‘Kondi kon kuhaon mo ito, isasalikway ka niya.’

Salit hi Jehova nagsiring: ‘Sige, kuhaa ito. Buhata kan Job an ngatanan nga maraot nga karuyag mo. Makikita naton kon isasalikway ba niya ako. Ayaw la hiya pagpataya.’

Siyahan, iginpakawat ni Satanas an kabakahan ngan mga kamelyo ni Job, ngan ginpamatay an iya kakarnerohan. Katapos, ginpamatay niya pinaagi han alipuros an 10 nga anak ni Job. Sunod, iginpadapat ni Satanas kan Job inin maul-ol nga sakit. Nag-antos gud hi Job. Salit an iya asawa nagsiring: ‘Isalikway an Dios basi mamatay ka na.’ Kondi waray ito buhata ni Job. Katapos, inabot an iya tulo nga diri tinuod nga sangkay ngan nagsiring nga nagbuhat hiya hin maraot. Kondi hi Job nagpabilin nga matinumanon.

Tungod hini, nalipay gud hi Jehova, salit iya ginbendisyonan hi Job sugad han makikita mo ha retrato. Gintambal Niya an sakit ni Job. Nagkaada hi Job hin 10 nga mas gwapo ngan maghusay nga anak, ngan nadoble an kadamu han iya kabakahan, kakarnerohan, ngan mga kamelyo.

Magigin matinumanon ka ba pirme kan Jehova pariho kan Job? Kon buhaton mo ito, bibendisyonan ka liwat niya. Mabubuhi ka ha kadayonan kon an bug-os nga tuna magin makaruruyag na sugad han hardin han Eden.