ANA ngakumtendela canasa mundu jwakulwalaju? Lina lyakwe lili Yobu, soni jwamkongwejo ali ŵamkwakwe. Ana akumanyilila yakuŵeceta kwa Yobu? Jwalakwe akuti: ‘Amtukane Mlungu kuti awe.’ Kwende tulole ligongo lyakwe akuŵeceta yeleyo, soni ligongo lyakwe Yobu ŵayiweni yipwetesi mnope.

Yobu ŵaliji mundu jwakulupicika juŵampikanilaga Yehofa. Jwalakwe ŵatamaga m’cilambo ca Usi, cicaŵandikene ni ca Kanani. Yehofa ŵamnonyelaga mnope Yobu, nambo papali jwine juŵam’ŵengaga Yobu. Ana akummanyilila?

Jwalakwe ŵaliji Satana. Akumbucile kuti Satana ali lilayika lyalikusam’ŵenga Yehofa. Jwalakwe ŵakombwele kwatendekasya Adamu ni Hawa kuti akampikanila Yehofa, kaneko ŵaganisisye kuti yili yakomboleka kumtendekasyasoni jwalijose kuti akampikanilaga Yehofa. Nambo ana ŵakombwele kutenda yeleyi? Iyayi. Agambe ganisya ya acalume ni acakongwe ŵakulupicika ŵatulijiganyisye ŵala. Ana ŵalingwa ŵakwakumbucila mena gawo?

Yakobo ni Yusufu paŵawile ku Eguputo, Yobu ŵaliji mundu jwakulupicika mnope kwa Yehofa pacilambo cosope capasi. Yehofa ŵasakaga kummanyisya Satana kuti jwalakwe ngaŵa mkupakombola kumtendekasya jwalijose kuŵa jwakusakala, m’yoyo Mlungu ŵatite: ‘Mumlole Yobu. Jwalakwe ali jwakulupicika mnope kwa une.’

Satana ŵasisisye acitiji: ‘Jwalakwe ali jwakulupicika ligongo lyakuti wawo ampele majali, soni akwete yindu yambone yejinji. Nambo naga akumtyocesya yindu yakweyi, jwalakwe cacalwesa.’

Sambano Yehofa ŵamsalile kuti: ‘Jawulani. Mumtyocesye yindu yakwe yosope. Tendani yindu yakusakala yamkusaka kwa Yobu. Citulole naga calwese une. Gambani kulolecesya kuti mkam’wulaga jwalakwe.’

Candanda, Satana ŵatendekasisye kuti ŵandu ajiŵe ng’ombe ni ngamiya sya Yobu, soni ngondolo syakwe syawulajigwe. Kaneko Satana ŵawuleje ni cimbungo ŵanace ŵa Yobu ŵacilume ni ŵacikongwe ŵakwana 10. Kanekosoni, Satana ŵamlwasisye Yobu ulwele wakogoyawu. Yobu ŵalwasile mnope. Ni ligongo lyakwe ŵamkwakwe Yobu ŵamsalile kuti: ‘Amlwese Mlungu kuti awe.’ Nambo Yobu nganatenda yeleyo. Nambosoni, acimjakwe ŵakulambucisya ŵatatu ŵayice kukumsalila kuti jwalakwe ŵatendaga yindu yakulemweceka pa umi wakwe. Nambo Yobu ŵajendelecele kuŵa jwakulupicika.

Yeleyi yamsangalesye mnope Yehofa, ni kaneko jwalakwe ŵampele majali Yobu, mpela mwakuyiwonela pa ciwulilipa. Ŵamposisye ulwele wakwe. Yobu ŵakwetesoni ŵanace ŵane 10 ŵakusalala, soni ŵakwete ng’ombe, ngondolo ni ngamiya syejinji kuwilisya kaŵili ni syaŵakwete pandanda.

Ana wawojo caciŵa ŵakulupicika kwa Yehofa ndaŵi syosope mpela Yobu? Naga akutenda yeleyo, Mlungu cacapasoni majali. Cacikomboleka kutama ni umi mpaka kalakala pandaŵi jacacicilinganyaga cilambo capasi cosopeci kuti ciŵe cakusalala mpela mgunda wa Edeni.