¿MAʼ WA ta chʼaʼik óotsilil tiʼ le kʼojaʼanoʼ? U kʼaabaʼeʼ Job, le koʼoleloʼ u yatan. ¿A wojel wa baʼax kiaʼalik tiʼ Job? Kʼaakʼastʼant Dios ka kíimkech. Koʼox ilik baʼaxten letiʼeʼ tiaʼalaj upʼéel baʼal beyaʼ, yéetel baʼax oʼolal sen muʼyajnaj Job.

Jobeʼ utúul máak jach chúukpaj u yóol u beet baʼax u kʼáat Jéeoba. Letiʼeʼ tiʼ kajaʼan kaʼach tu luʼumil Uzeʼ, maʼ náach tiʼ u luʼumil Canaaniʼ. Jéeobaeʼ jach u yaabilma Job, baʼaleʼ yaan kaʼach máax pʼekmai. ¿A wojel wa máax?

Satanás le Kʼaasilbaʼaloʼ. Kʼaʼajaktecheʼ, Satanaseʼ letiʼe kʼasaʼan ángel pʼekmai Jéeobaoʼ. Letiʼeʼ páajchaj u beetik u maʼ uʼuyajtʼantaʼal Jéeoba tumen Adán yéetel Eva, yéetel ku tuklik xaneʼ jeʼel u páajtal u beetik u maʼ uʼuyajtʼantaʼal Jéeoba tumen tuláakal máakeʼ. Baʼaleʼ, ¿páajchaj wa u beetik leloʼ? Maʼatech. Kʼaʼajaktech jaytúul xiiboʼob yéetel koʼoleloʼob tsʼoʼok k-kanik teʼ libro chúukpaj u yóol u meyajtoʼob Diosoʼ. ¿Jaytúul jeʼel u páajtal a waʼalik u kʼaabaʼeʼ?

Le ka tsʼoʼok u kíimil Jacob yéetel José Egiptoeʼ, Jobeʼ letiʼe máak maas chúukpaj u yóol tiʼ Jéeoba way Luʼumeʼ. Jéeobaeʼ u kʼáat kaʼach u yeʼes tiʼ Satanás maʼatan u páajtal u kʼaskúuntik tuláakal máak, le oʼolaleʼ tiaʼalajtiʼ: Ilawil Job, ilawil bukaʼaj chúukaʼanil u yóol tiʼ teen.

Satanás túuneʼ tiaʼalaj: Letiʼeʼ chúukaʼan u yóol, tumen ka beetik u bin utsil tiʼ yéetel yaʼab baʼaloʼob maʼalobtak yaan tiʼ. Baʼaleʼ wa ka láaj luʼsiktiʼeʼ, yaan u kʼaakʼastʼantkech tu táan a wich.

Le oʼolaleʼ Jéeobaeʼ tiaʼalajtiʼ: Xeen, luʼs tuláakal baʼaloʼob yaan tiʼ. Beet jeʼel baʼalak tiʼeʼ, ka k-il wa jeʼel u kʼaakʼastʼantkeneʼ. Baʼaleʼ, kanáant bik xiʼikech a kíimse.

Yáaxeʼ, Satanaseʼ tu beetaj u yokoltaʼal u wakaxoʼob, u tamanoʼob yéetel tu beetaj u kíimsaʼal u camelloʼob Job. Tu beetaj xan u kíimil u diez paalal Job yéetel upʼéel kʼaʼamkach iikʼ. Ka tsʼoʼokeʼ, Satanaseʼ tu beetaj u yantal upʼéel kʼaakʼas kʼojaʼanil tiʼ Job. Jobeʼ jach muʼyajnaji. Le oʼolaleʼ u yataneʼ tiaʼalajtiʼ: Kʼaakʼastʼant Dios ka kíimkech. Baʼaleʼ Jobeʼ maʼ tu beetiʼ. Kʼuch xan xíimbaltbil tumen óoxtúul máakoʼob ku yeʼeskubaʼob bey u amigoʼobeʼ ka tiaʼaloʼobtiʼeʼ yaan baʼax kʼaas u beetmaj. Baʼaleʼ, Jobeʼ láayliʼ chúukpaj u yóol tiʼ Dioseʼ.

Lelaʼ tu beetaj u jach kiʼimaktal u yóol Jéeoba, le oʼolaleʼ tu beetaj u bin utsil tiʼ Job, jeʼex k-ilik teʼ dibujoaʼ. Tsʼaʼak tumen Jéeoba. Jobeʼ yanchaj xan uláakʼ diez u paalal kiʼichkelemtak, yéetel u wakaxoʼob, u tamanoʼob yéetel u camelloʼobeʼ tsʼaʼab u kaʼatéen tiʼ le bukaʼaj yantiʼ kaʼachoʼ.

¿Yaan wa u chúukpajal a wóol mantatsʼ tiʼ Dios jeʼex Jobeʼ? Wa beyoʼ, Dioseʼ yaan xan u beetik u bintech utsil. Yaan u páajtal a kuxtal mantatsʼ ken jatsʼutskíintaʼak le Luʼum jeʼex le jardín tiʼ Edén kaʼachoʼ.