¿XÍ RASACLOʼ órni rabilo buñguitz ni noʼ ló dibuj reʼ? Laabu Job, né buñgonaʼ ni noʼ né láabu ngú tzeelbu. ¿Nanlo xí cayaibybu Job la? Láabu cayaibybu Job: Goní mal de Dios né goity. Guibino xigony goníbu diitz mal reʼ, né xigony Job nigolú godudy ló galnagan.

Job bisobbu né bunybu guirá ór ni ná Jehová. Láabu golesbu lainy toib gudx ni góc laa Uz, ni goyoʼ gahx de Canaán. Jehová nigolú gondxibu Job, per goyoʼ toib ni bianladx láabu. ¿Nanlo chú ngú ni bianladxgulu a Job la?

Ndeʼ góc Buñdzab. Bisednaladx, Buñdzab ngú toib ángel ni rianladx a Jehová. Láabu bunybu que Adán né Eva diti nasobyibu Jehová, né xpensarybu ngú que guirá buñ scúca ñony. Per ¿birebuʼ ni goní Buñdzab la? Yaca. Bunysi xpensarylo, guirá buñguieeu né buñgonaʼ ni ma bisuidyno ni buny ni ná Dios. ¿Balacyibu labúu guisetlalo?

Dzú ni Jacob né José goity lainy gudx Egipto, Job bidxin góc toib ni más buny ni ná Jehová ló guidopynac Gudxlio. Jehová gochbu Buñdzab: Bibiʼ Job. Láabu ngú toib buñ ni nigolú rony ni raabi. Né diitzreʼ, Jehová bislooy Buñdzab que diti labúu sonybu que guirá buñ gac buñ mal.

Buñdzab goní: Láabu ronybu ni nálo, portín looy rasiablo xilaaylo né raduidylo xiroʼ cós buen láabu. Per pal gahxlo guirá ni biduidylo láabu saniʼbu mal de looy.

Por ngú, Jehová góoch láabu: Goyee gohx guirá ni napbu. Buny mal láabu guirá mod nainy looy. Guibino pal guinibu mal de naʼ. Nosi gop cuidad diti guigaitylo láabu.

Ni primer buny Buñdzab láani ngú que tipnés buñ golann xidal clas nimal xtuny Job né camey, né xilieen xtunybu goity. Né bigaitybu guirá chii xiin Job ló toib buroʼdant. Né bicaʼbu galguitz reʼ laidy Job né por ngú nigolú godudybu ló galnagan. Por ngú tzeelbu góoch láabu: Goní mal de Dios né goity. Job diti gosaguel. Láaca bidxin tzón ximig falzbu né góoch láabu que noʼ ni bunybu nagach nisló Dios. Per Job diti bisiambu de bunybu ni ná Jehová.

Ndeʼ buny que Jehová nabaladx, né láaca biduidybu xilaaybu cuaʼ Job xomod rabilo ló dibuj reʼ. Bisialbu xcalguitz Job. Job goyoʼ sa chii xiin ni nigolú móz góc, né bidal xinimalbu, camey né xiil ni gopbu, né guirá ndeʼ chop midid bidalyimu más que ni gopbu antes.

¿Sonylo ni ná Jehová guirá ór xomod Job la? Pal sonylo ni nábu, Dios láaca saduidy xilaay looy. Labúu sabanylo tipzó ló Gudxlio órni sadxin sácni toib lagary móz xomod góc Edén.