Stori 27: Wan Nogud King i Rul Long Ijip
LONG pija ya, sam man oli stap fosem ol narafala man blong oli wok. !Traem lukluk man ya we i stap wipim wan slef! Ol slef ya oli man Isrel, ol famle blong Jekob. Olgeta we oli stap fosem ol man Isrel ya blong wok, oli man Ijip. Ol man Isrel oli slef blong ol man Ijip. ?Olsem wanem samting ya i bin hapen?
Bigfala famle blong Jekob i stap plante yia long Ijip. Oli stap long pis, i no gat trabol. Josef i lukaot gud long olgeta. Hem i wan hae man long Ijip, king Fero nomo i hae moa long hem. Be biaen, Josef i ded. Mo wan narafala Fero, we i no laekem ol man Isrel, i kam king blong Ijip.
Ale, nogud Fero ya i mekem se ol man Isrel oli kam slef. Mo, hem i putumap sam man we oli raf mo oli nogud, blong oli bos strong long ol man Isrel ya. Oli fosem ol man Isrel blong wok had blong bildim ol taon blong Fero. Nating se i olsem, ol man Isrel oli gohed blong kam plante. Sam taem i pas, nao ol man Ijip oli stat fraet se bambae ol man Isrel oli kam plante tumas mo strong tumas.
?Yu save wanem samting Fero i mekem? Hem i tok long ol woman we oli stap givhan long ol woman Isrel taem oli bonem pikinini. Hem i talem se: ‘Sipos yufala i luk se pikinini i boe, yufala i mas kilim i ded.’ Be olgeta ya oli gudfala woman. Oli no save kilim ol pikinini ya i ded.
Taswe Fero i talem long olgeta man blong hem se: ‘Sipos wan woman Isrel i bonem wan pikinini boe, bambae yufala i mas kilim pikinini ya i ded, ol gel nomo bambae oli stap.’ ?Yu ting se tok ya blong Fero i gud? Nogat, hem i nogud tumas. Be bambae yumi luk olsem wanem wan smol boe i stap sef.
Eksodas 1:6-22.
Ol Kwestin
- ?Long pija ya, hu ya man ya we i stap wipim narafala? ?Hem i stap wipim hu?
- ?Taem Josef i ded, wanem i hapen long ol man Isrel?
- ?From wanem ol man Ijip oli fraet long ol man Isrel?
- ?Fero i talem wanem long ol woman we oli stap givhan long ol woman Isrel taem oli bonem pikinini?
Sam narafala kwestin
- Ridim Eksodas 1:6-22.
?Olsem wanem Jeova i stat mekem promes blong hem long Ebraham i kamtru? (Eks. 1:7; Jen. 12:2; Wok 7:17)
?Ol woman we oli givhan long ol woman Isrel taem oli bonem pikinini, oli mekem wanem blong soem se laef i tabu? (Eks. 1:17; Jen. 9:6)
?Jeova i givim wanem blesing long ol woman ya we oli bilif strong long hem? (Eks. 1:20, 21; Prov. 19:17)
?Setan i mekem wanem blong traem spolem plan blong Jeova long saed blong laen blong Ebraham? (Eks. 1:22; Mat. 2:16)
