Maana 27nan

Masakɛjugu bɛ Misira kunna

CƐ MINNU bɛ yan yɔrɔ la, olu bɛ ka mɔgɔw diyagoya ka baara kɛ. E ka cɛ lajɛ min bɛ ka baarakɛla dɔ bugɔ ni busan ye! Nin baarakɛlaw bɛɛ bɔra Yakuba denw de la. U bɛ wele ko Israɛlkaw. Cɛ minnu bɛ ka u diyagoya ka baara kɛ, olu ye Misirakaw ye. Israɛlkaw kɛra Misirakaw ka jɔnw ye. O sera ka kɛ cogo di?

Yakuba ka denbaya sigira hɛrɛ la san caman kɔnɔ Misira jamana na. Yusufu min tun ye mɔgɔba fɔlɔ ye Faraon kɔfɛ, tun y’a mago don u la. Nka, Yusufu sara. Masakɛ kura sigira Misira kunna min tun tɛ Israɛlkaw fɛ.

O Faraon kura tun ka jugu kosɛbɛ. Ale de ye Israɛlkaw kɛ jɔnw ye. A ye cɛw fana bila Israɛlkaw kunna minnu tun ka jugu. U tun bɛ ko kunntanw kɛ fana. O cɛw de ye Israɛlkaw diyagoya ka baara kologɛlɛn  kɛ. O baara tun ye ka dugubaw jɔ Faraon ye. O bɛɛ n’a ta, Israɛlkaw tun bɛ ka caya ka taa a fɛ. Waati dɔ nana kɛ, Misirakaw siranna, bawo Israɛlkaw cayara kosɛbɛ, ani u barika bonyara kosɛbɛ fana.

I b’a dɔn Faraon ye min kɛ wa? Muso minnu ka baara ye ka muso kɔnɔmaw lajigin, Faraon y’a fɔ olu ye ko: ‘Ni den o den wolola Israɛlkaw fɛ, ni cɛ don, aw k’a faga.’ Nka, muso minnu tun bɛ muso kɔnɔmaw lajigin, o musow tun ka ɲi. U ma sɔn ka denyɛnin cɛmanw faga.

Faraon tilala ka nin ci fɔ Misirakaw bɛɛ ye, ko: ‘Aw ka Israɛlkaw ka denyɛnin cɛmanw bɛɛ faga. Aw ka denyɛnin musomanw dɔrɔn to ɲɛnamaya la.’ Faraon ye o ci min fɔ, o tun ye kojuguba ye dɛ! Denyɛnin cɛman dɔ kisira cogo min na, an k’o lajɛ ɲɔgɔn fɛ.

Ekisode 1:​6-22.