MALUNGA wano unamono hano kanashinjila atu hanga alingi mulimo kutachi. Tala auze unalamba umwe mukwa mulimo! Akwa milimo kali asoko ja Yakomba, waze anavuluka ngwo A-Izalele. Waze anaashinjila ku milimo ya kutachi kali A-Engitu. A-Izalele halumuka tupinji ja A-Engitu. Kuchi chino chinakapwa?

Ha miaka yinji, asoko ja Yakomba kanakatwama ni sambukila mu Engitu. Yosefwe, yoze unakapwa lunga mulemu kunyima lia mwanangana Falau, mwe unakapwa ni kwaafunga. Alioze Yosefwe yafwa. Nawa ni Falau mwaha yoze unakahinga wata mu Engitu, te keshi kuzanga A-Izalele.

Falau yono te mupi chinji, kashika iye yatenga A-Izalele tupinji two. Nawa iye Yaasela tupatashi api nawa a uswiyi. Ayo yashinjila A-Izalele ku milimo ya kutachi hanga atungile Falau mambonge. Alioze A-Izalele yapwa anji chinji ha kwaalula cho. Kashika, A-Engitu yapwa ni woma unji ngwo nyi A-Izalele mooka chinji, ayo mapwa ni tachi jinji.

Yena unanyingika yize Falau anakalinga? Iye yahanjika ni yifunguji waze apwile ni kufungula mapwo A-Izalele, ngwenyi: ‘Yenwe ndo nushahe ana a malunga eswe waze anasemuka.’ Alioze mapwo jacho kanakapwa apema chinji kakashahile ni umwe mwana.

Ha chino, Falau yatuma atu jenyi eswe ngwenyi: ‘Andenu ana a malunga eswe A-Izalele hanga nwashehe. Ana a mapwo mahasa kusala ni mwono.’ Chino chili chipi chinji, nyi ngwami? Tutalenu chize umwe mwana wa lunga anakamulamwina.