SA BANN zonm ki ou vwar la pe fors sa bann dimoun pour travay. Get sa zonm ki pe tap enn sa bann travayer avek en fwet! Sa bann travayer zot tou zot sorti dan fanmiy Zakob, e zot bann Izraelit. E sa bann zonm ki pe fors zot pour travay se bann Ezipsyen. Bann Izraelit in vin lesklav bann Ezipsyen. Konman ki sa in arive?

Pour plizyer lannen fanmiy Zakob ti viv anpe an Lezip. Zozef, sa zonm ki ti pli enportan Lezip apre lerwa Faraon ti pran swen avek zot. Me apre Zozef ti mor. E en nouvo Faraon ki pa ti kontan bann Izraelit ti vin lerwa Lezip.

Alor sa move Faraon ti fer bann Izraelit vin lesklav. E i ti fer bann zonm ki ti pa bon e kriyel ansarz zot. Zot ti fors bann Izraelit pour travay dir, konstri bann lavil pour Faraon. Me bann Izraelit ti kontinyen ogmante. Apre en serten letan bann Ezipsyen ti konmans per ki bann Izraelit ti pou vin bokou e pli for.

Eski ou konnen ki Faraon ti fer? I ti koz avek bann madanm ki ti ed bann manman Izraelit kan zot ti donn nesans zot pti baba, e dir: ‘Zot devret touy tou bann pti baba garson ki ne.’ Me zot ti bann bon madanm, e zot pa ti pou touy sa bann pti baba.

Alor Faraon ti donn sa konmann avek tou son pep: ‘Pran bann pti baba garson ki pour bann Izraelit e touy zot. Selman les zis bann pti baba fiy viv.’ Eski sa pa i en move keksoz pour komande? Annou vwar konman ki enn sa bann pti baba garson ti ganny sove.