I ƝƐƐ be mɔgɔ nunu na, u be fanga baara kɛra. U be u la dɔ bugɔra ni busan ye. O baarakɛlaw ye Yakuba ka denbaya mɔgɔw ye minw be weele ko Israɛldenw. Minw ye u bila o fanga baara la olu ye Misirakaw ye. Israɛldenw kɛra Misirakaw ka jɔɔnw ye. O koo kɛra cogo di?

Saan caaman kɔnɔ, Yakuba ka denbayaba tora hɛɛrɛ la Misira jamana na. Yusufu min tun kɛra masacɛ Farahuna ka lasigidenw bɛɛ la mɔgɔba ye, ale lo tun b’a janto u la. Nka, Yusufu nana sa ani masacɛ kura dɔ sigira Misira kun na. Israɛldenw koo tun man di ale ye.

O masacɛ jugu ye Israɛldenw kɛ a ka jɔɔnw ye. A ye mɔgɔ farimanw sigi u kun na. U tun be Israɛldenw waajibiya ka baara gwɛlɛ kɛ walisa ka duguw lɔ Farahuna ye. O bɛɛ n’a ta, Israɛldenw tora ka caya. Misirakaw nana siran ko Israɛldenw kana na caya kojugu ani ka fanga sɔrɔ ka tɛmɛ olu kan.

I b’a lɔn Farahuna ye min kɛ wa? A y’a fɔ Israɛlmusow ka tinminɛlaw ye ko: ‘Deen o deen mana wolo, ni cɛden lo, aw k’a faga.’ Nka o tinminɛlaw tun ye muso ɲumanw ye, u ma sɔn ka denɲɛninw faga.

O la, Farahuna ye cii nin di a ka mɔgɔw ma: ‘ A’ ye Israɛl denɲɛnin cɛmanw minɛ k’u faga, nka aw ka musodenw dɔrɔn to yen.’ Nin tun ye cikan jugu ye dɛ! An k’a filɛ denɲɛnin cɛman dɔ kisira cogo min na.