Ahọlu Ylankan de Dugán to Egipti
OTÀN 27
Ahọlu Ylankan de Dugán to Egipti
SUNNU he tin to yẹdide ehe mẹ lẹ to gbẹtọ lẹ hẹn po huhlọn po nado wazọ́n. Pọ́n dawe he yí obá do to hihò dopo to azọ́nwatọ lọ lẹ mẹ! Azọ́nwatọ lọ lẹ wá sọn whẹndo Jakọbu tọn mẹ, bo nọ yin yiylọdọ Islaelivi lẹ. Podọ mẹhe to hinhẹn yé po huhlọn po nado wazọ́n lọ lẹ yin Egiptinu. Islaelivi lẹ ko lẹzun afanumẹ Egiptinu lẹ tọn. Gbọnna?
Whẹndo daho Jakọbu tọn nọ jijọho mẹ to Egipti na owhe susu. Josẹfu, he yin omẹ nukundeji hugan to Egipti bọdo ahọlu Falo go nọ penukundo yé go. Ṣigba Josẹfu wá kú. Podọ Falo devo he ma yiwanna Islaelivi lẹ wá lẹzun ahọlu to Egipti.
Falo ylankan ehe yí Islaelivi lẹ do basi afanumẹ. E sọ yí sunnu okànọ po kanylantọ lẹ po do basi ogán do yé ji. Yé nọ hẹn Islaelivi lẹ po huhlọn po nado wazọ́n sinsinyẹn bo gbá tòdaho lẹ na Falo. Etomọṣo, Islaelivi lẹ fọ́n bo to susudeji janwẹ. To ojlẹ vude godo, Egiptinu lẹ jẹ budi ji dọ Islaelivi lẹ na wá suhugan bo na dohuhlọn taun.
Be a yọ́n nuhe Falo wà ya? E dọna yọnnu he nọ gọalọna Islaelivi yọnnu lẹ nado jivi lẹ dọmọ: ‘Mì dona nọ hù visunnu he yin jiji lẹpo.’ Ṣigba yọnnu ehelẹ yin mẹdagbe bo ma nọ hù viyẹyẹ lọ lẹ.
Enẹwutu Falo degbena omẹ etọn lẹpo dọmọ: ‘Mì bẹ viyẹyẹ sunnu Islaeli tọn lẹ bo hù yé. Viyẹyẹ yọnnu lẹ kẹdẹ wẹ mì ni jodo ogbẹ̀.’ Be e ma yin gbedide ylankan de wẹ enẹ yin ya?Gbọ mí ni pọ́n lehe dopo to viyẹyẹ sunnu lọ lẹ mẹ yin whinwhlẹngán do.
