ANG mga tao diri nagapilit sa mga tao sa pag-obra. Tan-awa ang isa ka tao nga nagalatigo sa isa nga naga-obra! Mga Israelinhon ang naga-obra. Kag mga Egiptohanon ang nagapaobra. Ang mga Israelinhon mga ulipon sang mga Egiptohanon. Paano ini natabu?

Sa madamung tinuig ang dakung pamilya ni Jacob nagpuyo nga may paghidait sa Egipto. Si Jose tuman ka importante nga tao didto, kag gintatap niya sila. Apang napatay si Jose. Kag ang bag-ong Paraon, nga wala naluyag sa ila, naghari sa Egipto.

Gani gin-ulipon sining malain nga Paraon ang mga Israelinhon. Ginpilit niya ang mga Israelinhon nga magtrabaho sing lakas sa pagtukod sing mga siudad. Apang nagdamu ang mga Israelinhon. Sang ulihi hinadlokan ang mga Egiptohanon nga basi magdaku gid ang mga Israelinhon kag magtuman kabaskog.

Nahibaloan mo bala kon ano ang ginhimu ni Paraon? Ginsilingan niya ang mga babae nga nagapabata sa Israelinhon nga mga babae: ‘Patya ang tagsa ka bata nga lalaki nga mabun-ag.’ Apang maayo ining mga babae, kag indi magpatay.

Gani gisugo ni Paraon ang tanan niya nga tinao: ‘Patya ang Israelinhon nga mga bata nga lalaki lamang! Pabayai ang mga babae nga lapsag.’ Indi bala makakulogmat yadto nga sugo? Tan-awon ta kon ang isa ka bata nga lalaki naluas.