COV txivneej hauv daim duab no tabtom yuam tibneeg ua haujlwm. Koj puas pom tus txivneej uas tuav rab nplawm? Nws tabtom nplawm tus neeg ua haujlwm. Cov neeg ua haujlwm no hu ua cov Yixayee. Lawv yog Yakhauj cov xeeb ntxwv. Cov txivneej uas yuam lawv ua haujlwm yog cov Iyi. Cov Iyi tau muab cov Yixayee yuam ua qhev. Ua li cas ho muaj li no?

Yakhauj thiab nws tsev neeg nyob kaj siab lug hauv Iyi tebchaws tau ntau xyoo. Yauxej yog tus saib xyuas lawv. Hauv Iyi tebchaws Yauxej yog tus uas tseem ceeb tshaj plaws uas yau Falau xwb. Tiamsis tom qab Yauxej tuag lawm muaj ib tug Falau tshiab sawv kav Iyi tebchaws. Nws tsis nyiam cov Yixayee.

Yog li ntawd, tus Falau uas phem no muab cov Yixayee ua qhev. Nws tsa ib co txivneej phem thiab limhiam heev los saib xyuas lawv. Cov txivneej ntawd yuam cov Yixayee ua haujlwm hnyav heev. Lawv ua tsev rau Falau tej nroog. Txawm li ntawd los, cov Yixayee pheej coob zuj zus ntxiv xwb. Ib ntus tom qab ntawd, cov Iyi thiaj ntshai tsam cov Yixayee coob thiab muaj zog tshaj lawv.

Yog li ntawd, Falau thiaj ua li cas? Nws hais rau cov pojniam uas pab cov Yixayee yug menyuam tias: ‘Nej yuav tsum muab txhua tus menyuam tub uas yug los tua pov tseg.’ Tiamsis cov pojniam ntawd yog neeg zoo. Lawv thiaj tsis kam tua cov menyuam tub.

Yog li ntawd, Falau hais li no rau tag nrho nws cov tibneeg tias: ‘Muab cov Yixayee tej menyuam mos uas yog tub tua. Tiamsis tseg cov ntxhais xwb.’ Tej uas Falau hais no phem kawg li, puas yog? Cia peb mus kawm saib ua cas ib tug metub thiaj dim.