INAI tatau ese taunimanima idia doridia idia gaukara totona. Gaukara tauna ta ia kwadia noho tauna mani oi itaia! Idia gaukara noho taudia be Iakobo ena ruma bese taudia, bona idia gwauraidia Israela taudia. Bona gaukara totona Israela taudia idia doridia taudia be Aigupito taudia. Israela taudia be Aigupito taudia edia hesiai taudia ai idia lao. Unai be edena bamona ia vara?

Lagani momo lalonai Iakobo ena ruma bese badana be mai maino ida Aigupito dekenai idia noho. Aigupito ena king Farao henunai ia noho biaguna badana, Iosepa, ese idia ia naria. To gabeai Iosepa ia mase. Bona Israela taudia ia ura henia lasi Farao matamatana ta be Aigupito ena king ai ia lao.

Unai dainai inai Farao dikana ese Israela taudia be hesiai taudia ai ia halaodia. Bona idia naria totona ia halaoa taudia be dagedage taudia. Israela taudia idia doria Farao ena hanua idauidau karaia gaukarana dekenai idia gaukara goada totona. To Israela taudia edia namba be ia bada ia lao. Gabeai, Aigupito taudia idia gari badina idia laloa Israela taudia do idia hutuma bona idia goada herea.

Farao ia karaia gauna oi diba, a? Israela hahine be natuna idia havaraia neganai, ia ese edia durua hahinedia ia hamaoroa: ‘Do idia havaraia memero ibounai umui hamasea.’ To inai hahine be hahine namodia, bona idia ese memero maragidia idia hamasedia lasi.

Unai dainai Farao ese ena taunimanima ibounai ia haganidia: ‘Israela taudia edia memero maragidia umui abia bona umui hamasedia. Natuna kekeni sibona do idia mauri.’ Unai be hahegani dikana, ani? Natuna mero ta idia hamauria dalana mani ita itaia.