Yir agellid yeḥkem ɣef Maṣer
TAQSIṬ TIS 27
Yir agellid yeḥkem ɣef Maṣer
ATNAN yergazen-agi ḥerrṣen lɣaci ad xedmen. Wali argaz-a yekkaten yiwen uxeddam s ujelkaḍ! Ixeddamen-agi meṛṛa kkan-d si twacult n Yeɛqub. Ţţusemman At Isṛayil. Imdanen-agi i ten-iţḥettimen ad xedmen d Imaṣriyen. At Isṛayil uɣalen d aklan n Imaṣriyen. Amek i d-yeḍra waya?
Ddeqs iseggasen i tɛac di lehna twacult tameqrant n Yeɛqub di Maṣer. Yusef, yellan d aneḥkam ameqran mbeɛd Ferɛun, yelha-d yid-sen. Lameɛna tura yemmut Yusef. Yekker-ed Ferɛun nniḍen ur nḥemmel ara At Isṛayil, yuɣal d agellid ɣef Maṣer.
Ferɛun-agi yella d amcum, yerra At Isṛayil meṛṛa d aklan. Isbedd yir lɛibad ijehlen akken ad ḥekmen fell-asen s ẓẓur. Ţḥettimen At Isṛayil ad xedmen sennig n tezmert-nsen akken ad bnun timdinin i Ferɛun. Lameɛna ɣas akka, At Isṛayil ţzidin rennun. Iɛedda kra n lweqt, Imaṣriyen ugaden ad ftin w’ad ǧehden akteṛ wat Isṛayil.
Teẓriḍ acu yexdem Ferɛun? Yenna i lqiblat, meḥsub tilawin iţɛawanen tiyemmatin ad rbunt: ‘Nɣemt mkul aqcic ara d-ilalen i Tɛibṛaniyin.’ Lameɛna, tilawin-agi lhant, ur nɣint ara llufanat-nni.
Ferɛun yumeṛ ihi i wegdud-is meṛṛa: ‘Mmɣet ɣef warrac n wat Isṛayil, tenɣem-ten meṛṛa. Ǧǧet kan tullas ad idirent.’ Ur yejhil ara Ferɛun-agi? A nwali tura amek i geţţusellek yiwen si llufanat-nni.
