Ngewa ya 27: Mũsumbĩ Mũthũku Nĩwasumbĩkie Misili
AŨME aa me vaa maendee na kũthũkũmĩthya andũ wĩa na vinya. Kwasisya mũndũ ũya ũnũũvyata ũmwe wa athũkũmi na mũsalisa! Athũkũmi asu nĩ ma mũsyĩ wa Yakovo na metawa Aisilaeli. Na andũ asu meũmathũkũmĩthya na vinya nĩ Amisili. Aisilaeli maĩ ngombo sya Amisili. Kwethĩiwe ũu ata?
Kwa myaka mingĩ andũ ma mũsyĩ mũnene wa Yakovo nĩmekalile Misili na mũuo. Yosevu, ũla waĩ mũndũ wa vata mũno nthĩ ya Misili kũatĩĩa mũsumbĩ Valao, nĩwamasũvĩaa. Ĩndĩ Yosevu nĩwakwie. Na Valao mweũ, ũtendete Aisilaeli, atw’ĩka mũsumbĩ wa nthĩ ya Misili.
Kwoou Valao ũsu mũthũku amatw’ĩkĩthya Aisilaeli ngombo. Na amaiĩa aũngamĩi maĩ onei na mataĩ na tei. Nĩmathũkũmĩthisye Aisilaeli wĩa waĩ na vinya mũno wa kwakĩa Valao ndũa. Ĩndĩ Aisilaeli nĩmaendeeie o na kwingĩva. Na ĩtina wa ĩvinda ĩna Amisili makwatwa nĩ w’ĩa nũndũ moonaa Aisilaeli ta matonya kwingĩva mũno na kwĩthĩwa na vinya mwingĩ.
We nĩwĩsĩ Valao eekie ata? Aneenie na iveti ila syateetheasya aka ma Aisilaeli kũsyaa, na asyĩa: ‘No nginya mũkowaa kĩla kana ka kavĩsĩ kasyawa.’ Ĩndĩ iveti isu syaĩ nzeo, na iyaaũaa twana tũu.
Kwoou ĩndĩ Valao anenga andũ make onthe watho amea: ‘Kĩla kana ka kavĩsĩ kasyawa osaai mũkoaa. No twana twa twĩlĩtu tw’oka mwĩekaa twĩkale thayũ.’ Ũsu waĩ ũndũ mũthũku mũno kwĩĩaa wĩkwe. Ekai twone ũndũ kamwe ka twana tũu twa tũvĩsĩ kavonokiw’e.
Kuma 1:6-22.
Makũlyo
- Nthĩnĩ wa visa, mũndũ ũũ wĩ na mũsalisa nũũ, na ekũna ũũ?
- Ĩtina wa Yosevu kũkw’a, kweekĩkie ata kwa Aisilaeli?
- Nĩkĩ Amisili makwatiwe nĩ w’ĩa kwondũ wa Aisilaeli?
- Valao ainengie watho mwaũ iveti ila syatetheeasya aka ma Isilaeli kusyaa?
Makũlyo ma kwongeleela
- Soma Kuma 1:6-22.
Yeova ambĩĩie kwĩanĩsya ũtianĩo wake na Avalaamu kwa nzĩa yĩva? (Kuma 1:7; Mwa. 12:2; Meko 7:17)
Iveti Aevelania ila syateetheasya aka ma Isilaeli kũsyaa syoonanisye ndaĩa ata kwa ũtheu wa thayũ? (Kuma 1:17; Mwa. 9:6)
Nĩ ĩtuvi yaũ iveti ila syatetheeasya aka ma Isilaeli kũsyaa syanengiwe nũndũ wa kwĩthĩwa syĩ ndĩkĩĩku kwa Yeova? (Kuma 1:20, 21; Nth. 19:17)
Satani atatie ata kũsiĩĩa kĩeleelo kya Yeova kĩla kyakonanĩtye na Ũsyao wa Avalaamu ũla wathanĩtwe? (Kuma 1:22; Mt. 2:16)
