EBʼ LI winq li yookebʼ chi taqlank chi kaw, aʼanebʼ laj Egipto. Jun laj Egipto yook xsakʼbʼal li moos. Li yookebʼ chi kʼanjelak saʼ li tenamit aʼin, aʼanebʼ laj Israel, ralal xkʼajol laj Jacob. Ebʼ laj Israel keʼkanaak choʼq xmoosebʼ laj Egipto. Chanru kikʼulmank aʼin?

Chiru naabʼal chihabʼ li xjunkabʼal laj Jacob sa keʼwank Egipto. Saʼ li tenamit aʼin, laj Faraon kixkʼe xwankil laj Jose. Joʼkan naq laj Jose kiʼilok re li xjunkabʼal laj Jacob. Abʼan laj Jose kikamk. Chirix chik aʼan, kiʼok chi jolomink jun chik laj Faraon ut aʼan moko sa ta kirilebʼ laj Israel.

Laj Faraon aʼin, kixkʼehebʼ laj Israel choʼq xmoos. Ebʼ laj Egipto maaʼusebʼ xnaʼlebʼ. Joʼkan naq kaw keʼtaqlank saʼ xbʼeenebʼ laj Israel re naq teʼxyiibʼ ebʼ li tenamit choʼq re laj Faraon. Moqon chik, ebʼ laj Israel keʼok chi naabʼaloʼk. Joʼkan naq ebʼ laj Egipto keʼok chi xuwak ut keʼxkʼoxla naq naru teʼnumtaaq ebʼ laj Israel saʼ xbʼeenebʼ.

Ma nakaanaw kʼaru kixbʼaanu laj Faraon? Kixye rehebʼ laj xokol kʼuulaʼal: ‹Teekamsi li kokʼ chʼinaʼal li yooqebʼ chi yoʼlaak›. Abʼan ebʼ li ixq aʼin chaabʼilebʼ xnaʼlebʼ ut inkʼaʼ keʼxkamsi li kokʼ chʼinaʼal.

Joʼkan naq laj Faraon kixkʼe jun li chaqʼrabʼ saʼ li tenamit: ‹Teekamsi chixjunilebʼ li kokʼ chʼinaʼal ebʼ aj Israel. Abʼan meekamsi li kokʼ ixqaʼal›. Yiibʼru xnaʼlebʼ laj Faraon, peʼyaal? Qilaq chanru kikoleʼk jun li chʼinaʼal.