DƐN man ya de fos di pipul dɛn fɔ wok. Luk da man we de bit wan pan di wokman dɛn wit wip! Di wokman dɛn na Jekɔb in fambul dɛn, we dɛn de kɔl di Izrɛlayt dɛn. Ɛn di man dɛn we de fos dɛn fɔ wok, na di Ijipshian dɛn. Di Izrɛlayt dɛn dɔn bi slev to di Ijipshian dɛn. Bɔt aw dis apin?

Jekɔb in fambul dɛn bin de wit kolat na Ijipt fɔ lɔng tɛm. Josɛf we na bin di bigman afta Fɛro, bin de kia fɔ dɛn. Bɔt naw Josɛf dɔn day. Ɛn di nyu Fɛro nɔ lɛk di Izrɛlayt dɛn.

So dis bad Fɛro bin mek di Izrɛlayt dɛn bi slev. Dɔn i put wikɛd man dɛn oba di Izrɛlayt dɛn. Dɛn wikɛd man ya bin de fos di Izrɛlayt dɛn fɔ wok tranga tranga wan fɔ bil bɔku bɔku os dɛn fɔ Fɛro. Bɔt di Izrɛlayt dɛn bin jɔs de bɔku na Ijipt. Afta sɔm tɛm, di Ijipshian dɛn fred se di Izrɛlayt dɛn go bɔku pas dɛn ɛn gɛt trɛnk pas dɛn.

Yu no wetin Fɛro du? I tɛl di uman dɛn we de ɛp di Izrɛlayt uman dɛn fɔ bɔn se: ‘Una kil ɛni bɔy pikin we di Izrɛlayt uman dɛn bɔn.’ Bɔt dɛn uman ya na gud uman dɛn, dɛn nɔ kil di pikin dɛn.

So Fɛro tɛl ɔl in pipul dɛn se: ‘Una tek ɔl di Izrɛlayt bebi dɛn we na bɔy pikin ɛn kil dɛn. Bɔt una nɔ kil di gyal pikin dɛn.’ Yu nɔ tink se na bad tin Fɛro tɛl in pipul dɛn fɔ du? Lɛ wi si aw wan pan di bɔy pikin dɛn bin sev.