ပူ ၂၇
စီၤပၤအအၢတဂၤ ပၢကီၢ်အဲၤကူပတူး အဂ့ၢ်
လၢတၢ်ဂီၤပူၤ ပှၤတဂၤအံၤ မၢဆူၣ်ပှၤလၢ ပှၤကမၤတၢ်လီၤ. ကွၢ်, ပှၤတဂၤတီၢ် ပှၤမၤတၢ်ဖိတဂၤ လၢနီၣ်ဖျ့တဘီ. ပှၤမၤတၢ်ဖိတဖၣ်န့ၣ် မ့ၢ်ယၤကိာ်အဒူၣ်ဖိထၢဖိတဖၣ်ဒီး ဘၣ်တၢ်ကိးအီၤလၢ ပှၤအံၣ်စရ့လးဖိတဖၣ်န့ၣ်လီၤ. ပှၤလၢအမၢဆူၣ်ပှၤမၤတၢ်တခီ မ့ၢ်ပှၤအဲၤကူပတူးဖိတဖၣ်လီၤ. ပှၤအံၣ်စရ့လးဖိတဖၣ် ဟဲကဲထီၣ် ပှၤအဲၤကူပတူးဖိတဖၣ်အကုၢ်န့ၣ်လီၤ. ကဲထီၣ်ဝဲဒ်လဲၣ်.
ယၤကိာ်အပှၤဟံၣ်ဖိဃီဖိတဖၣ် အိၣ်ဝဲလၢကီၢ်အဲၤကူပတူး ခုၣ်ခုၣ်မုာ်မုာ် အါနံၣ်အါလါန့ၣ်လီၤ. လၢကီၢ်အဲၤကူပတူးအပူၤ ဖၤရိၤဝံၤပှၤအဒိၣ်ကတၢၢ် ယိၤသး အံးက့ၤကွၢ်က့ၤအဝဲသ့ၣ်လီၤ. ဘၣ်ဆၣ် လၢခံန့ၣ် ယိၤသးသံဝဲဒၣ်လီၤ. ဝံၤဒီး, ဖၤရိၤအသီတဂၤလၢ အတဘၣ်အသးလၢ ပှၤအံၣ်စရ့လးဖိ ဟဲကဲထီၣ် အဲၤကူပတူးအစီၤပၤလီၤ.
ဒ်န့ၣ်ဒီး ဖၤရိၤလၢအအၢအသီတဂၤအံၤ မၤကဲထီၣ်ပှၤအံၣ်စရ့လးဖိ လၢကုၢ်န့ၣ်လီၤသၢၣ်. ဝံၤဒီး ပာ်လီၤဝဲ ပှၤအၢအၢသီသီတဖၣ် လၢကပၢအဝဲသ့ၣ်န့ၣ်လီၤ. မၢပှၤအံၣ်စရ့လးဖိ နးနးကျံၤကျံၤ လၢတၢ်သူၣ်ထီၣ်ဝ့ၢ်တဖၣ် လၢဖၤရိၤအဂီၢ်န့ၣ်လီၤ. သနာ်က့ အံၣ်စရ့လးအနီၢ်ဂံၢ်တခီ တအိၣ်ပတုာ်ဘၣ်ဒီး အါထီၣ်ဂီၢ်ထီၣ်ဝဲန့ၣ်လီၤ. တယံာ်ဘၣ်, ပှၤအဲၤကူပတူးဖိတဖၣ် ပျံၤထီၣ်ဝဲဒၣ်လၢ ပှၤအံၣ်စရ့လးဖိ အနီၢ်ဂံၢ်ကအါထီၣ်, အဂံၢ်အဘါ ကဆူၣ်ထီၣ်ဝဲန့ၣ်လီၤ.
ဖၤရိၤမၤမနုၤလဲၣ် နသ့ၣ်ညါဧါ. ကိးဝဲဒၣ် ပှၤကွၢ်အံၣ်စရ့လးအမိၢ်တဖၣ်အဟုးဒီးစံးဝဲဒၣ် ‘သုကဘၣ်မၤသံ ကယဲၢ်ပိာ်ခွါဖိလၢအဟဲအိၣ်ဖျဲၣ်ထီၣ် တဂၤလၢ်လၢ်န့ၣ်လီၤ’. ဘၣ်ဆၣ် အဝဲသ့ၣ်တခီ အသူၣ်ဂ့ၤအသးဝါအဃိ တမၤသံဖိသၣ်တဖၣ်န့ၣ်ဘၣ်.
ဒ်န့ၣ်အဃိ ဖၤရိၤထုးထီၣ်အကလုၢ်ဆူအပှၤတဖၣ်အအိၣ်, စံးဝဲဒၣ်, ‘မၤသံအံၣ်စရ့လးပိာ်ခွါဖိသၣ်ခဲလၢာ်, ပာ်မူထဲဒၣ်ပိာ်မုၣ်ဖိသၣ်တဖၣ်န့ၣ်တက့ၢ်’ န့ၣ်လီၤ. တမ့ၢ်တၢ်ကလုၢ်လၢ အအၢဒိၣ်မးန့ၣ်ဘၣ်ဧါ. ပိာ်ခွါဖိသၣ်တဂၤ မ့ၢ်မၤအိၣ်မူတ့ၢ်ဝဲဒၣ်ဒ်လဲၣ်န့ၣ် ပကွၢ်သကိးတက့ၢ်.
