WANTU awaya omwene besadisanga akaka e salu yangolo. Tala ndiona owandanga nsadi mosi. Asadi awaya esi nzo a Yakobo, beyikilwanga vo Aneyisaele. Ana bekubasadisanga e salu yayi esi Engipito. Aneyisaele bakituka s’abundu a Angipito. Aweyi diavangamena ediadi?

E nzo a Yakobo mvu miayingi yazingila muna Engipito mu luvuvamu. O Yosefe wa muntu atunda muna Engipito walandilanga Faro wa ntinu, wabalunga-lunganga. Kansi, o Yosefe wafwa. Faro wampa kazolanga Aneyisaele ko wakituka se ntinu a Ngipito.

O Faro ndioyo wambi, okitwidi Aneyisaele s’abundu. Osidi wantu ambi muna kubayingila ekolo basalanga. Bakomena Aneyisaele salu yambâdi, yatungila Faro e mbanza. Kufwila lubangamu lwalu ko, Aneyisaele basundidi Angipito e ngolo yo wokela. Ediadi, diabamwesanga wonga.

Ng’ozeye dina kavanga o Faro? Wavovesa kw’awutisi akento a Ayibere vo vava nukubawutisa “ovo se mwan’eyakala numvonda.” Kansi, akento awaya wantu ambote bakala, ke bavondanga nsedia mia wan’amakala ko.

Muna kuma kiaki, Faro okanikini nkangu andi awonso vo: ‘Konso mwan’eyakala wa Aneyisaele owutuka, numvonda. Mwan’ankento kaka nusis’o moyo.’ Nkia mpila nsoki! Tutala una nsedia mosi kavuluzilwa.