ABA balalume bali apa balukupatikisya abantu ukupyunga. Lolesya uyu mwalalume alukupama umo pali baba abalukupyunga ku cembya! Aba balukupyunga ba mu lupwa lwakwe Yakobi, kabili balabeta ati abaIsilaeli. Ne balalume abalukubapatikisya ukupyunga baletwa ati abaIjipiti. AbaIsilaeli baba pano basya ba baIjipiti. Calicitikile syani ici?

Pa myaka iingi ulupwa lwakwe Yakobi ulukulu lwalikele mu butende mu Ijipiti. Josefi, uwali umucindeme mu calo ca Ijipiti ukukonka pali Falo imfumu, alukubasunga. Pano Josefi alifwile, Falo umbi, uutatemenwepo abaIsilaeli, e wabele imfumu ya Ijipiti.

Iyi imfumu iibipile eyacitile abaIsilaeli ubusya. Yalibikile abakubasopa abakubule’nkumbu kabili ababipile’mitima. Balukupatikisya abaIsilaeli ukupyunga makosa pa kwibaka imisi yakwe Falo. Pano nangabe’fyo abaIsilaeli balukuya lukoso ili bafunuka. Panuma yakupite’mpindi abaIjipiti balyumfwilo’mwenso wakweba’ti abaIsilaeli bakafunuka ne kuba abakosele.

Kani ungesiba ici Falo acitile? Kalabila ku fimbela ifyalukupaapisya abana ba baIsilaeli ati: ‘Kani umwana umwalalume afyalwa kamumwipaya.’ Pano ifi fimbela fyali fiweme imitima, pakuti tafyalukwipayapo abana.

Eli Falo apele ili funde ku bantu bonse: ‘Buleni umwana onse umwalalume uwa baIsilaeli ne kumwipaya. Sombi abanakasi bonse mukabaleke ne mweo.’ Kani talyali lifunde ilikatesye ilyo? Pano ngatubone kamo pa twano’twalalume ifi kapulukile.

Ifyakufuma 1:6-22.