Opi Onziri Ni Angu Nyazu Misiria Ri
A’DIKO 27
Opi Onziri Ni Angu Nyazu Misiria Ri
AGUPI ’diyi okpo ayu fezu ’ba ’diyi ni azi nga zu. Mi ndre nga agu ’ba alu azi ngapiri copi enyi kali siri! ’Ba azi ngapi ’diyi anzi Yakobo ni ’bani omvele ’ba Israelini ’diyi. ’Ba eyi fepi azi ngapi okposi ’diyi. ’Ba Israelini nga di eca a’tiboru ’ba Misiria ’diyi dri. ’Di ’ye i ngoni ngoni ya?
Eli angiri Yakobo vile ’ba akua kakua ’diyi o’a Misiria asi anzururisi. Yusufu ndra ’ba angiri ru Misiria Farau ma vutia namba iri si opi ru ri te ndra eyi ma ageyi muke. Te Yusufu nga dra ra. Farau o’di ni nga eca opiru Misiria ni te leni ’ba Israelini ’diyi ku.
Farau onzi ’di nga di ’ba Israelini ’diyi ’ba a’tibo ru. Nga ’ba adra pie azini a’oko ru ’diyi ’ba eyi ma dricere ru. ’Ba ri di ’ba Israelini ni dri candi fe eyini azi ngazu okposi aku Farau ni sizu. Te kiriti ’ba Israelini nga ezu tre aga ra. ’Da ma vutia ’ba Misirini ’diyi nga eca urisi adusiku ’ba Israelini ’diyi nga eca tre azini okporu tu.
Mi ni Farau ’ye a’du afa ni’a ri ra ya? Nga e’yo nze oku, okporovu ma aza ko’ba ositasi ’diyi be kini: ‘Emi ma fu agupianzi osipi ’diyi dria.’ Te oku ’diyi ndra oku muke ni, ani eyi ofu ni anzi ’diyi ku.
Farau nga azita ’diri fe ’ba ’dria idri ’diyi ni: ‘Imi ma ’du agupianzi odekuleru Israelini ’diyi emi ma fu yi ra. Emi ma ku lu ezoanzi ru ’diyi a’dule.’ ’Di ovuni azita fele onzi ’dinile ri ku ya? Ama ma ndre di agupiamva azi aluni nga i pa ngoni ngoni’a ri.
