JE CHJOTA xosíkjoan matsen ibi tjíobʼénele je chjota nga katasíxá. ¡Chótsenlalai je xi nʼósí tíbale je chjota xi tísíxá! Je chjota xi tjíosíxásí ya kitjenni Jacob, kʼoa chjota israelita ʼmile. Kʼoa chjota egipcio xosíkjoan tjíobʼénele nga tjíosíxá. Je chjota israelita choʼndale koan je chjota xi ya tsʼe Egipto. Jókoannile.

Nkjín koanni ntje̱le Jacob kʼoa nkjín nó nga nyʼán tsakatio ya Egipto. Je José xi koanjaonile Faraón, kʼoa xi nʼio ngʼa tsakʼejna ya Egipto jé kisikuinda chjota israelita. Tonga je José chan kʼien. Kʼoa jngo Faraón xi kjaʼai xi tsín tsjoake je chjota israelita tsakatéxoma ya Egipto.

Faraón tsʼen jebi choʼnda kisikao je chjota israelita. Kʼoa jé kitsjoale xá chjota xi nʼio tsʼen nga kisikuinda. Je chjota xokjoan tsakʼénele je chjota israelita nga nʼio kisixá nga nkjín ndʼia tsakʼéndale Faraón. Tonga je chjota israelita tosi tonda koannkjínya. Nga je ki nichxin je chjota egipcio kitsokjonle je chjota israelita tsa nʼio koa̱nnkjínya kʼoa tsa nʼio tse nganʼio sʼele.

A ʼyaní jmeni xi kisʼin Faraón. Kinchjale yánchjín xi binyakao je yánchjín israelita nga sʼele ʼndí, kʼoa kitsole: “Tjínneno nga sikʼaon je ʼndílee xi jtsín xi xʼin”. Tonga nda chjota koan yánchjín jebi, kʼoa likui kisikʼien ʼndílee xi xʼin.

Kuinga i̱ kitsosínile Faraón je naxinandále: “Ngatsʼi ʼndílee xi xʼin xi israelita, tikʼaon. Toje ʼndílee xi yánchjín tikatío”. A tsí nʼio chʼaotjín nga kui tsakʼéne je Faraón. Chótsenlalee josʼin kitjontjai jngo ʼndí xi xʼin.