Enn Move Lerwa Diriz L’égypte
Zistwar 27
Enn Move Lerwa Diriz L’égypte
SA BANN zom-la pe fors bann dimounn pou travay. Get sa misie ki pe donn kout fwet enn travayer la! Sa bann travayer-la se bann Izraelit, bann desandan Jacob. Sa bann zom ki pe fors zot pou travay la, se bann Ezipsien. Bann Izraelit inn vinn zot esklav. Me kouma sa finn arive?
Pandan boukou lane, fami Jacob, ki’nn grandi, inn viv anpe dan l’Égypte. Joseph ti dimounn pli inportan dan l’Égypte apre lerwa Pharaon, ek li ti bien pran zot kont. Me apre lamor Joseph, enn nouvo Pharaon, ki pa kontan bann Izraelit, inn vinn lerwa dan l’Égypte.
Sa move Pharaon-la fer bann Izraelit vinn bann esklav. Li met bann zom ki brit, ki pena pitie an-sarz zot. Sa bann zom-la fors bann Izraelit pou travay bien dir pou ranz bann lavil pou Pharaon. Me kanmem sa, bann Izraelit kontign ogmante dan l’Égypte. Apre inpe letan, bann Ezipsien koumans gagn per bann Izraelit. Zot per pangar bannla vinn tro boukou ek tro for.
Eski to kone ki Pharaon fer? Li koz ar bann madam ki ed bann Izraelit pou gagn tibaba, ek li dir zot: ‘Zot bizin touy tou ti garson ki ne.’ Me bann madam-la pa fer seki Pharaon dir zot.
Lerla, Pharaon donn sa lord-la tou so pep: ‘Pran tou bann ti garson ki ne parmi bann Izraelit ek touy zot. Les zis bann tifi vivan.’ Se enn lord bien kriel, pa vre? Anou gete kouma enn parmi sa bann ti garson-la reisi sape.
