TLAPOUALISTLI 27

Se tekiua amo yolkuali itech Egipto

TLAKAMEJ tlen nikan tikinmita kinchiualtijtokej tlaltikpaktlakamej ma tekitikan. ¡Xikita tlakatl tlen kiuiteki se tekipanojki ika mekatl! Tlakamej tlen tekititokej yejuan ichanejkauan Jacob, uan kintokayotiaj israelitas. Uan egipcios kinchiualtiaj chikauak ma tekitikan. Israelitas yokinchijkej intlakeualuan. ¿Ken opanok nin?

Ipan miak xiuitl nochtin ichanejkauan Jacob okipiayaj yolseuilistli itech Egipto. José, akin oueyitijtoka itech Egipto, maski amo ijkon ken ueyi tekiua Faraón, ye okinmaluiaya israelitas. Maski ijkon, satepan José omikik. Uan se yankuik Faraón, akin amo okintlasojtlaya israelitas, opejki tlanauatia itech Egipto.

Ik non, nin Faraón tlen amo yolkuali okichi israelitas ma yetokan ken tlakeualtin. Uan okintlali sekimej tlakamej tlen amo yolkualmej pampa ma kinnauatikan. Yejuan okinchiualtiayaj israelitas ma tekitikan chikauak pampa kichiuiliskiaj altepemej Faraón. Maski ijkon, israelitas okachi omomiaktilijtokaj. Seki kauitl satepan egipcios opejkej momojtiaj pampa israelitas uelis okachi momiaktiliskiaj uan uelis kinmixnamikiskiaj.

¿Tikmati tlen okichi Faraón? Okinnotski siuamej tlen okinpaleuiayaj siuamej israelitas ma kinpiakan inkoneuan, uan okinmilui: ‘Moneki nankinmiktiskej nochtin konemej tlakamej tlen nesiskej’. Maski ijkon, ken ninmej siuamej okatkaj yolkualmej, amo okinmiktiayaj konemej tlakamej.

Ik non, Faraón okinauati nochi ialtepetl: ‘Nochtin konemej tlakamej israelitas, xikinmiktikan. San xikinkauakan konemej siuamej’. ¿Amo melauak nin se tlanauatil tlen amo kuali? Ma tikitakan ken omomakixti se konetsintli.

Éxodo 1:6-22.