KO E tau tagata taane nei kua fakagahua fakatupatupa e tau tagata. Onoono la ke he tagata ne fahi aki e uipi e taha he tau tagata gahua! Ko e tau tagata gahua ko e magafaoa ha Iakopo, ti fakahigoa a lautolu ko e tau Isaraela. Ti ko e tau tagata ne fakagahua fakatupatupa a lautolu ko e tau Aikupito. Kua eke tuai e tau Isaraela mo tau tagata fakatupa he tau Aikupito. Tupu mai fēfē e mena nei?

Ke he loga he tau tau ne nonofo mafola e magafaoa lahi ha Iakopo i Aikupito. Ko Iosefa ko e tagata ne mua atu e tokoluga i Aikupito, ko e hagai ke he patuiki ko Farao, ne leveki fakamitaki a lautolu. Ka e fakahiku ti mate a Iosefa. Ti ko e Farao foou kua nakai fiafia ke he tau Isaraela, kua eke mo patuiki ki Aikupito.

Ko e Farao kelea nei ne fakatupa e tau Isaraela. Ti tuku e ia e tau tagata taane hemu mo e favale, ke leveki a lautolu. Ne fakatupatupa e lautolu e tau Isaraela ke gahua fakamalolō ke talaga e tau maaga ma Farao. Ka kua malikiti tumau ni e numera he tau Isaraela. Fai magaaho he mole, ne matakutaku e tau Aikupito neke tokologa mo e malolō lahi e tau Isaraela.

Iloa nakai e koe e mena ne taute e Farao? Ne tutala a ia ke he tau fifine ne lagomatai e tau matua fifine Isaraela ka fanau e tau tama mukemuke ha lautolu, mo e pehē: ‘Kia tamate e mua e tau tama taane oti ka fanau.’ Ka ko e tau fifine mitaki anei, to nakai tamate e laua e tau tama mukemuke.

Ti tuku age e Farao e poakiaga nei ke he tau tagata oti haana: ‘Uta e tau tama taane Isaraela oti mo e tamate a lautolu. Kia fakamomoui ni e tau tama mukemuke fifine.’ Nakai kia ko e poakiaga kelea lahi mahaki a ia? O mai la ke kitia e puhala ne kua fakahao e taha he tau tama mukemuke taane.