Ekitebyo 27

Omugabe Mubi Okutegyeka Misri

ABASHAIJA aba hanu nibagyema abantu kukora. Reeba ogwo mushaija orikuteeza omwe aha bakozi enkoba! Abakozi n’ab’omu ka ya Yakobo, kandi nibeetwa Abaisraeli. Kandi abashaija abarikubagyema kukora n’Abanyamisri. Abaisraeli bahindukire abahuuku b’Abanyamisri. Eki kikabaho kita?

Okumara emyaka mingi eka ya Yakobo empango ekaba etwire omu busingye omuri Misri. Yosefu, owaabaire ari mukuru kandi owa kabiri ahari Faraho omugabe wa Misri, akaba nabareeberera. Kwonka bwanyima Yosefu akafa. Kandi Faraho omusya, owaabaire atarikukunda Abaisraeli, yaaba omugabe wa Misri.

N’ahabw’ekyo Faraho ogu omubi yaahindura Abaisraeli abahuuku. Kandi yaabata ahansi y’obushoboorozi bw’abashaija abaabaire bari ab’eitima kandi abashaarizi. Baagyema Abaisraeli kukora munonga omu kwombeka endembo za Faraho. Kwonka nabwe Abaisraeli baaguma nibeyongyera omu bwingi. Ku haahweireho omwanya, Abanyamisri baatiina ngu shana Abaisraeli bakaba nibaija kuba baingi munonga kandi bagire amaani maingi munonga.

Noomanya eki Faraho yaakozire? Akagamba n’abakazi abaabaire bahwera Abaisraelikazi baaba nibazaara yaabagira ati: ‘Nimuragiirwa kwita buri mwana w’omwojo weena oraazaarwe.’ Kwonka aba bakaba bari abakazi barungi kandi bakaba batarikubaasa kwita abaana abo.

Faraho nikwo kuha abantu be boona ekiragiro eki; ‘Mutware abaana b’aboojo ab’Abaisraeli mubaite. Hagumeho abaishiki bonka.’ Ekyo kikaba kitari ekintu kibi munonga eky’okuragiira? Ka tureebe oku omwe aha baana b’aboojo aba yaahonokireho.

Okuruga 1:6-22.