OLKETA man long hia forcem pipol for waka. Lukim man wea whipim wanfala man wea waka! Olketa wea waka hia olketa from famili bilong Jacob, olketa Israelite. And olketa man wea forcem olketa for waka olketa pipol bilong Egypt. Olketa Israelite kamap slave for olketa bilong Egypt. Hao nao diswan happen?

For plande year bigfala famili bilong Jacob stap long peace long Egypt. Joseph, wea hem barava important man long Egypt, wea only king Pharʹaoh nomoa garem moa paoa winim hem, hem lukaftarem olketa. Bat then Joseph hem dae. And wanfala niu Pharʹaoh, wea no laekem olketa Israelite, hem kamap king long Egypt.

So disfala nogud Pharʹaoh hem mekem olketa Israelite kamap slave. And hem putim olketa man wea raf tumas for lukaftarem olketa. Olketa forcem olketa Israelite for waka hard for buildim olketa bigfala taon for Pharʹaoh. Bat olketa Israelite still gohed for kamap plande. Gogo olketa bilong Egypt fraet nogud olketa Israelite kamap plande tumas and moa strong.

So iu savve wanem nao Pharʹaoh hem duim? Hem sei olsem long olketa woman wea helpem olketa Israelite mami taem olketa bornem pikinini: ‘Iufala mas killim dae evri baby boy wea born.’ Bat olketa hia olketa gudfala woman, and olketa no want for killim dae olketa baby.

So Pharʹaoh givim disfala komand long pipol bilong hem: ‘Tekem olketa Israelite baby boy and killim olketa dae. Letem olketa baby gele nomoa for stap laef.’ Datwan hem barava nogud samting for komandim. Bae iumi lukim hao olketa sevem wanfala baby boy.