KURI mannooti manna loosanno gede giddeessitanni no. Kuneeti manchu loossannori giddonni mitto jiraafetenni gananna lai! Loossanni noori Yaaqoobi gaˈreeti; insano Isiraeelete gosa yaamantanno. Insa loossanno gede gadadissanni noori kayinni Gibitsete mannaati. Isiraeelete gosa Gibitsete mannira borojje ikkitino. Hiitto ikkite borojje ikkitu?

Yaaqoobiti halaˈlado maate Gibitsete gobbara lowo diro keerunni heedhino. Gibitsete gobbara nugusu Feeriooninni layinki nugusa ikkinohu Yooseefi, insa danchu garinni towaatinonsa. Hakkunni gedensaanni Yooseefi reyi. Qoleno Isiraeele baxannokkihu wolu Feeriooni Gibitsete nugusa ikki.

Konnira, kuni bushu Feeriooni Isiraeelete gosa borojje assiri. Qoleno bushuullenna kaajjadda mannoota insa aana moohisi. Hakko mannooti Isiraeelete gosa Feerioonira katama mintanno gede giddeessitunsa. Ikkollana Isiraeelete gosa kiiro lexxitanni hadhu. Hakkunni gedensaanni Gibitsete gosa, Isiraeele batidhe aliidire ikkitanno yite waajjitu.

Feeriooni marichcho assinoro afootto? Isiraeelete meento ilshiishannoha Gibitsete meento togo yii: ‘Ilamannoha labbaa qaaqqo baala shiiyye.’ Ikkollana kuni meenti danchuulle ikkino daafira, qaaqquulle dishiino.

Konni daafira Feeriooni mannasi baala, ‘Isiraeelete gosaha labballo qaaqquulle shiiyye. Meyaa qaaqquulle calla agurre’ yee hajaji. Tini macca gibbanno hajajo diˈˈikkitino? Mittu labbaa qaaqqi hiitto ikke shinikki gatinoro hanni laˈno.