IKILIOK luu kane ejaasi abuikin itunga aswam. Koany etunganan lo ejaai aswalanar ediopet koswamak kede ebela loisialakak. Eswamaak eraasi luko okale loka Yakob ido enyaritai Isiraelin. Itunga lu ejaasi abuikin kesi aswam kesi luko Misiri. Arautu Isiraelin ibulesin kotoma otunga luko Misiri. Epone ani atakanunatar nu?

Abu ekale loka Yakob lo apol noi kiboi kotoma ainapakina ko Misiri adaun ikar luipu. Yosep etunganan lo apol noi ko Misiri lo atupit Parao ekabaka ngesi edarit kesi. Konye abu Yosep otwana. Ido Parao loitetet lomam akoto Isiraelin nesi abu oraun ekabaka ko Misiri.

Kitarau Parao lo Isiraelin ibulesin ke. Abu kigwaik itunga lu aninik itaon ido odedeng ayait kesi. Apotu kobuikis Isiraelin aswam noi aiduk ireria luepolok kanuka Parao. Konye apotu Isiraelin kiyatakisi aipuar noi. Akaulo naadit, kokuriakata itunga luko Misiri ebe epote Isiraelin aipuakar noi ka agogongor.

Ijeni ijo nu abu Parao iswama? Abu inerakinos kede angor nu a engaranakinete angor nu Isirael aidoun, kobala ebe: ‘Koarata nginikoku kere yeni erai isapat yeni idouno.’ Konye araasi nu angor nu ajokak mam aarete idwe.

Aso, kijaik Parao ekisil lo otunga ke kere: ‘Koyangasi idwe lusap luka Isiraelin ido koarat kes. Kojalakis idwe lupesur bon aijar.’ Mam kereka ngin arai ibore yen arono cut aicorakin? Kaanyutu epone lo etajarere idiopet kodwe lusap.