27-нҗи хекая

Мүсүрде залым патыша хөкүм сүрйәр

БУ АДАМЛАР халкы зорлук билен ишледйәрлер. Хол адамың ишчини гамчы билен уршуна бир серет! Бу ишчилер Якубың машгаласындан. Олара ысрайыллылар диййәрлер. Олары ишледйән адамлар болса мүсүрлилер. Ысрайыллылар мүсүрлилериң элинде гулчулыкда. Йөне олар нәдип бу гүне дүшдүлеркә?

Якубың улы машгаласы көп йылларың довамында Мүсүрде асуда яшапды. Себәби Юсуп Мүсүрде фараондан соң икинҗи адамды хем-де оларың аладасыны эдйәрди. Эмма Юсуп өленден соң, Мүсүрде башга фараон патыша боляр. Ол болса ысрайыллылары халанокды.

Шонда бу залым фараон ысрайыллылары гул этди. Шейле-де оларың үстүнден залым ве рехимсиз гөзегчилери гойды. Олар фараона шәхер гурмак үчин ысрайыллылары зорлук билен көп ишледйәрдилер. Муңа гарамаздан, ысрайыллылар гитдигиче көпелйәрди. Мүсүрлилер болса горкдулар, себәби бирнәче вагтдан ысрайыллылар көпелип, гүйчли болар өйтдүлер.

Шонда фараоның нәме эденини билйәңми? Ол гөбегенелере: «Сиз яңы доглан хер бир огланҗыгы өлдүрмели» дийип буйрук берди. Йөне олар рехимли аялларды ве чагалары өлдүрмедилер.

Шонда фараон халкына: «Яңы доглан огланлары оларың элинден алып өлдүриң. Диңе гызларыны өлдүрмәң» дийип буйрук берди. Эйсем, бу рехимсиз буйрук дәлми? Гелиң, яңы доглан бир огланҗыгың нәдип халас боланыны билелиң.

Чыкыш 1:6—22.