KO E kau tangata ko ‘ení ‘oku nau fakamālohi‘i ‘a e kakaí ke nau ngāue. Sio ki he tangata ‘okú ne taa‘i ‘a e tokotaha ‘o e kau ngāué ‘aki ha uipi! Ko e kau ngāué ko e fa‘ahinga mei he fāmili ‘o Sēkopé, pea na‘e ui ko e kau ‘Isileli. Pea ko e kau tangata ‘oku nau fakamālohi‘i kinautolu ke nau ngāué ko e kau ‘Isipite. Na‘e hoko ‘a e kau ‘Isilelí ko e kau pōpula ki he kau ‘Isipité. Na‘e hoko fēfē ‘a e me‘a ko ‘ení?

Na‘e nofo melino pē ‘a e fāmili tokolahi ‘o Sēkopé ‘i ‘Isipite ‘i he ngaahi ta‘u lahi. Na‘e tokanga‘i kinautolu ‘e Siosifa, ‘a ia ko e tangata mahu‘inga taha ia ‘i ‘Isipite tukukehe ‘a Felo ko e tu‘í. Ka na‘e mate ‘a Siosifa ia. Pea na‘e hoko hake ha Felo fo‘ou ko e tu‘i ‘o ‘Isipite, pea na‘e ‘ikai te ne sai‘ia ‘i he kau ‘Isilelí.

Ko ia ko e Felo kovi ko ‘ení na‘á ne ‘ai ‘a e kau ‘Isilelí ko e kau pōpula. Pea na‘á ne fokotu‘u ha kau tangata anga-kovi mo anga-ta‘e‘ofa ke nau pule‘i kinautolu. Na‘a nau fakamālohi‘i ‘a e kau ‘Isilelí ke nau ngāue mālohi ke langa ‘a e ngaahi kolo ‘o Feló. Ka na‘e kei hokohoko atu pē ‘a e tupu ‘o tokolahi ‘a e kau ‘Isilelí. Faifai atu pē pea na‘e ilifia ‘a e kau ‘Isipité na‘a hoko ‘o fu‘u tokolahi mo fu‘u mālohi ‘a e kau ‘Isilelí.

‘Okú ke ‘ilo ‘a e me‘a na‘e fai ‘e Feló? Na‘á ne lea ki he kau fefine na‘a nau tokoni ki he ngaahi fa‘ē ‘Isilelí ‘i he‘enau fā‘ele‘i ‘enau fānaú ‘o ne pehē: ‘⁠Kuo pau ke mou tāmate‘i ‘a e pēpē tangata kotoa pē ‘e fanau‘i mai.’ Ka ko e kau fefine lelei ‘eni ia, pea na‘e ‘ikai te nau tāmate‘i ‘a e ngaahi pēpē.

Ko ia na‘e fai ‘e Felo ‘a e fekaú ni ki hono kakai kotoa pē: ‘⁠Tāmate‘i ‘a e ngaahi pēpē tangata ‘Isileli kotoa pē. Tuku ke mo‘ui pē ‘a e ngaahi pēpē fefine kotoa.’ ‘Ikai ko ha fekau fakalilifu ‘eni ke fai? Tau sio ange pe na‘e anga-fēfē ‘a e hao mo‘ui ‘a ha pēpē tangata ‘e taha.