БО эр кижилер чонну күш-биле албадап ажылдадып турар. Көрем, дуу кижи ажылчынны кымчы-биле канчаар соп турар-дыр! Ол ажылчыннар Иа́ковтуң өг-бүлезинден үнген — оларны изра́ильчилер деп адаар. А оларны албадап ажылдадып турар эр кижилер дээрге еги́петчилер-дир. Изра́ильчилер еги́петчилерниң кулдары апарган. Ынчалза-даа ол канчап ындыг болу бергенил?

Хөй чылдар дургузунда Иа́ковтуң улуг өг-бүлези Еги́петке тайбың чурттап келген. Оларның дугайында Ио́сиф сагыш човаан, а ол Еги́петке фарао́ннуң соонда эң кол кижи турган. Ынчалза-даа оон Ио́сиф мөчээн. А Еги́петке изра́ильчилерге ынак эвес чаа фара́он хааннай берген.

Ынчан ол каржы фарао́н изра́ильчилерни кулдар кылып алган. Оларны кадарар кылдыр, ол каржы, дерзии хайгааракчылар тургузуп каан. Олар изра́ильчилерни күш-биле албадап, фарао́нга хоорайлар тудары-биле, кадыг-берге ажылдар кылдыртып турган. Ындыг болза-даа, изра́ильчилерниң саны көвүдеп-ле турган. Кезек үе эрткенде еги́петчилер Изра́иль чоннуң эмин эрттир көвүдээш, аажок күштүг апаарындан коргуп эгелээн.

Фарао́н чүнү кылыпканыл, билир сен бе? Изра́иль иелерге божуурунга дузалажып турган херээженнерге ол дужааган: ‘Чаа төрүттүнген оол бүрүзүн өлүрер ужурлуг силер’. Ынчалза-даа олар эки херээженнер турган болгаш чаш уругларны өлүрерин күзевээн.

Ынчан фарао́н бодунуң бүгү чонунга дужааган: ‘Чаа төрүттүнген изра́ильчи оолдарны былаап алгаш, өлүрүңер. Чүгле кыстарны дириг артырыңар’. Бо дужаал кээргел чок эвес-тир бе? Бир чаа төрүттүнген оол канчаар камгалаттына бергенил, билип алыылам.