TE WINIKETIK te ya awil liʼ ini yak sujbelik ta aʼtel te ants winiketike. ¡Ilawil te winik te yak ta smajel sok chikote te jtul winik te yak ta aʼtele! Te j-aʼteletik jaʼ stsʼumbalik te Jacobe, te sbiilinejik israeletik. Te machʼatik ya sujawanik ta aʼtele jaʼ te egipcioetike. La smosoinik te israeletike. ¿Bin utʼil kʼot ta pasel ini?

Bayal jaʼbil kuxinik ta lamal kʼinal ta Egipto te stsʼumbal te Jacobe. Te José te jaʼ mukʼ skʼoplal kʼot ta Egipto bitʼil xchebal ajwalil ta stojol te Faraón jaʼ la skanantay te israeletike. Jaʼukmeto laj bael te José. Jtul yachʼil Faraón te och ta ajwalil ta Egipto, maba lek la yiltiklan te israeletik.

Te chopol Faraón ini la smosoin te israeletike. Sok akʼotik ta wentainel yuʼun winiketik te kʼax chopolik sok te maʼyuk xkʼuxul yoʼtanike. Te winiketik ini la sujik ta tulan aʼtel te israeletik ta spasel mukʼul lumetik ta swenta te Faraone. Jaʼukmeto te israeletik bayal yakalik ta spʼolbel sbaik. Te kʼalal kʼaxix-a te kʼajkʼale te egipcioetik jajchik ta xiwel yuʼun teme kaj spʼol sbaikxan te israeletik sok teme la stsakxan bayal yipike.

¿Yabal anaʼ te bin la spas te Faraone? Ta swenta te antsetik te ya xkoltaywanik ta stambeyel yal te israel antsetike, jich albotik ta mantal yuʼun te Faraone: Yame amilik te alal keremetik te ya x-ayinike. Jaʼukmeto te antsetik ini lek yoʼtanik, melel ma la smilik te alaletike.

Jaʼ yuʼun te Faraón jich la yalbey ta mantal spisil te slumale: Spisil te alal israel keremetike, milaik. Mame xamilik stukel te alal achʼixetike. ¿Mabal jichuk te kʼax xiweltik sba te bin la yichʼ alel ta mantale? Ya kiltik bael te bin utʼil ma la yichʼ milel jtul alal kerem.