ALUME ava o lete ndeti, va kasi loku kisika omanu oco va talavaye. Tala ulume u o kasi ndeti loku veta vakuavo! Omanu va kasi loku vetiwa ndeti, epata lia Yakoba vana veya oku tukuiwa hati, va Isareli. Va Egito ovo va kasi loku kangisa ndeti vakuavo. Va Isareli veya oku linga apika kofeka Yegito. Ndamupi ca pita?

Ocili okuti, epata lia Yakoba lia kala Kegito vokuenda kuanyamo alua lombembua. Soma Fareo wa kapele Yosefe komangu ya velapo Kegito. Pole eci Fareo a fa vofeka Yegito mua viala osoma yikuavo okuti ya suvukile va Isareli.

Osoma yaco yeya oku kapa va Isareli kupika. Alume vana va tema haivo olongangala, wa va ĩha ovikele vioku lava va Isareli. Ovo va kisika va Isareli oku linga upange wa tĩla woku tunga olonjo vio vaimbo a Fareo. Pole va Isareli va amamako loku licita. Noke va Egito va fetika oku kuatela usumba va Isareli. Momo va Isareli va luile calua haivo va pama.

Ove hẽ wa kũlĩha eci Fareo a linga? Eye wa sapuila akãi vana va enda oku citisa akãi va Isareli hati: ‘Pondi omãla vosi valume va citiwa.’ Pole akãi vaco omo liesunga liavo, ka va pokuile kocihandeleko ca soma.

Noke Fareo wa eca ocihandeleko komanu vaye vosi, hati: ‘Pondi omõla wosi ulume ocitiwa pokati ka va Isareli. Te lika omãla vakãi ovo lika ka ci tava oku pondiwa.’ Eci ca kala ocihandeleko cimue cĩvi. Tu konomuisi ndomo oñaña yimue ya puluka.