GINPIPIRIT hini nga kalalakin-an an mga tawo nga magtrabaho. Kitaa an lalaki nga naglalatigo ha trabahador! An mga trabahador kapamilya ni Jakob, ngan tinatawag hira nga mga Israelita. Ngan an nagpipirit ha ira nga magtrabaho amo an mga Ehiptohanon. Nagin uripon han mga Ehiptohanon an mga Israelita. Paonan-o ini nahitabo?

Ha sulod hin damu nga katuigan, an daku nga pamilya ni Jakob mamurayawon nga nag-ukoy ha Ehipto. Ginmangnoan hira ni Jose, an nasunod ha katungdanan ni Hadi Paraon ha Ehipto. Kondi patay na hi Jose. Ngan iba na nga Paraon an hadi yana ha Ehipto ngan nasisina gud hiya ha mga Israelita.

Salit ginhimo nga uripon hinin maraot nga Paraon an mga Israelita. Salbahis ngan madarahog nga kalalakin-an an iya gintaporan ha pagpatrabaho ha ira. Ginpakurian nira an mga Israelita ha pagtukod hin mga syudad para kan Paraon. Kondi bisan pa hito, an mga Israelita padayon nga nagdamu. Inabot an panahon nga nahadlok an mga Ehiptohanon nga an mga Israelita magin duro kadamu ngan duro kakusog.

Maaram ka ba kon ano an ginbuhat ni Paraon? Ginsidngan niya an kababayin-an nga nagpapaanak ha mga Israelita: ‘Kinahanglan patayon niyo an ngatanan nga bata nga lalaki nga matatawo.’ Kondi buotan hira nga kababayin-an, ngan diri nira ginpapatay an mga bata.

Salit, ginsugo ni Paraon an ngatanan nga iya katawohan: ‘Kuhaa an Israelita nga mga bata nga lalaki ngan pataya hira, kondi ayaw pataya an mga bata nga babaye.’ Maraot gud ito nga sugo, diri ba? Aton kitaon kon paonan-o talwas an usa nga bata nga lalaki.