Ti rey malu runi mandar Egipto
Historia 27
Ti rey malu runi mandar Egipto
CA hombre ruuyuʼ raríʼ la? cucaacabe binni guni dxiiñaʼ. ¡Biiyaʼ ni caguiñe hombre cayuni dxiiñaʼ ca ne ti chicote! Cani cayuni dxiiñaʼ ca binnilidxi Jacob laacabe, rábicabe laacaʼ israelita. Ne cani cucaa laacabe gúnicabe dxiiñaʼ nga ca egipciu. Ca israelita riʼ beeda gácacaʼ esclavu stícabe. Ximodo guca ndiʼ yaʼ.
Ca binnilidxi Jacob bibánicaʼ Egipto ne guendariuudxi pur stale iza. Cumu José nga biropa hombre ni jma risaca de Egipto despué de Faraón la? gunda gupa laacabe. Peru gútisi José la? beeda guiasa sti Faraón ni beeda gaca rey stiʼ Egipto, rey riʼ qué ñuláʼdxidibe ca israelita.
Faraón, rey malu riʼ bíʼnibe ca israelita que esclavu stibe. Ne bíʼnibe de que tuudxi hombre malu ni qué iquiiñeʼ gapa laacabe. Ca hombre riʼ la? bicaacabe guni ca israelita riʼ dxiiñaʼ nadipaʼ ne gúnicaʼ jma guidxi para Faraón. Peru ca israelita que ziguidálerucaʼ. Despué la? ca Egipciu bidxíbicaʼ guidale ca israelita que ne gácacaʼ jma nadipaʼ que laacaʼ.
Nannuʼ xi biʼniʼ Faraón la? Guníʼnebe ca gunaa ni racané ca israelita que ora rápacaʼ xiiñicaʼ, rábibe laacaʼ: Nápatu xi guutitu guiráʼ hombrehuiiniʼ gale. Peru ca gunaa riʼ nabé nacháʼhuicaʼ ne qué ruuticaʼ ca baʼduhuiiniʼ riʼ.
Ngue runi Faraón biʼniʼ mandarbe guidubi guidxi stibe: Laguuti guiráʼ hombrehuiiniʼ de Israel, ne ca dxaapahuiiniʼ ca lagudii lugar guibánicaʼ. Ñee cadi guizáʼ feu nga ni biʼniʼ mandar Faraón riʼ la? Guidúʼyanu ximodo bilá ti hombrehuiiniʼ.
