ADKINTUFINGE feychi pichiche ngümalelu, nünieñmafi ñi changüll kuwü tachi üllcha domo. Tüfa ta Moyse. ¿Kimimi iney ngen tüfachi küme üllcha domo? Tüfa Faraon tañi ñawe tati, kiñe rume falin üllcha domo Egipto mew.

Moyse ñi ñuke ellkay tañi pichiche, puwülu küla küyen, pilay pu Egipto che ñi langümüñmayaetew. Welu kidu kimi ñi pengeal Moyse, feymu ta tüfa ñi femün tañi montulafiel.

Pepikay kiñe küllko fey ñi konnoal ko. Fey mew tukufi Moyse pu küllko, ka elkünuy ti küllko rangiñ pu rumentu mew inaltu Nilo lewfü mu. Feypifi Miriam, Moyse ñi deya, ñi inafül müleal ñi peafiel chem ñi rupayal.

Pürüm (pür), Faraon ñi ñawe küpay Nilo lewfü mu müñetualu. Perumefi ti küllko rumentu mew. Feypifi kiñe ñi pu kona domo: ‘Yelmeen feychi küllko.’ Chi falin üllcha domo nülafilu ti küllko, ¡müna küme ad pichiche pey! Tüfachi pichiche Moyse ngümaley, ka chi falin üllcha domo kutranduamyerkefi. Tüfachi üllcha domo pilay ñi langümngeal chi pichiche.

Feymew küpay Miriam. Peafuymi ti adentun mu. Miriam ramtufi Faraon ñi ñawe: ‘¿Amuafunchi ñi mütrümmeafiel kiñe Israel domo tami tremümmelaetew chi pichiche?’

‘May, füreneaen,’ pi ti falin üllcha domo.

Feymew lef amuy Miriam ñi feypiafiel ñi ñuke. Küpalu Moyse ñi ñuke chew ñi mülen ti falin üllcha domo, feypieyew: ‘Nüfinge tüfachi pichiche tremümmelan, iñche kulliaeyu.’

Feymu Moyse ñi ñuke tremümtuy (trengümtuy) kidu ñi püñeñ. Fey wüla Moyse doy tripantu nierpulu, ñi ñuke yelelfi Faraon ñi ñawe, fey kidu ñi wentru püñeñ trokifi. Feymu lle, Moyse tremi Faraon ñi ruka mew.