MONA akanya aka kalelila, akekete umunwe wa mwanakashi. Uyu umwana, ni Mose. Bushe naumwishiba uyu umwanakashi umusuma uuli apa? Mwana wa kwa Farao, imfumu ya ku Egupti.

Nyina wa kwa Mose alifishile umwana pa myeshi itatu, pa kuti abena Egupti bemwipaya. Lelo alishibe ukuti bushiku bumo bakamusanga. Natumone ifyo acitile pa kumupususha.

Abuulile basiketi no kumasako fimo pa kuti amenshi yelaingila. Lyena abikile Mose mu basiketi no kuibika mu fyani ifitali mu mbali ya Mumana wa Naelo. Nyina wa kwa Mose aebele Miriamu, nkashi ya kwa Mose, ukwiminina mupepi pa kuti alemona ifilecitika.

Papitile fye inshita inono, no mwana wa mfumu Farao aisa ku Mumana wa Naelo ku kusamba. Ilyo ali ku mumana, aishilemona basiketi mu fyani ifitali no kweba umubomfi wakwe umwanakashi ati: ‘Kansendele ilya basiketi.’ Ilyo umwana wa mfumu aiswile basiketi, asangile muli umwana umusuma! Umwana asangilemo alelila, e ico umwana wa kwa Farao alimumfwilile uluse. Talefwaya ukuti bamwipaye.

Miriamu alishile bwangu bwangu. E uyu umwaice ulemona pa cikope. Miriamu aipwishe umwana wa kwa Farao ati: ‘Bushe kuti mwatemwa nayaita umwanakashi umwina Israele uwa kumonsesha uyu umwana?’

Umwana wa mfumu atile: ‘Ee kamwite.’

E ico Miriamu aile ulubilo mu kwita banyina. Ilyo nyina wa kwa Mose afikile, umwana wa mfumu atile: ‘Senda uyu umwana no kulamonsha, nakulakulipila.’

Kanshi nyina wa kwa Mose umwine, e waisungile umwana. Ilyo Mose akulileko, nyina amutwele ku mwana wa kwa Farao, kabili aileba umwana wa mfumu. E calengele ukuti Mose akulile mu ng’anda ya kwa Farao.