Maana 28nan

Musa denyɛninnama kisira cogo min na

E KA denyɛnin lajɛ min bɛ ka kasi, ni a ye muso bolokɔni minɛ. Musa don. I b’a dɔn nin muso cɛɲi ye jɔni ye wa? Misira masakɛ denmuso don. A fa ye Faraon ye.

Musa woloba tun t’a fɛ Misirakaw ka Musa faga. O kosɔn, a ye Musa dogo fo a ye kalo saba sɔrɔ tuma min na. Nka, a tun b’a dɔn ko a tun tɛ se ka Musa dogo ka mɛn tun, k’a sɔrɔ mɔgɔw ma a ye. I b’a dɔn a ye fɛn min kɛ wa?

A ye segi dɔ ta, k’o mun koɲuman walisa ji kana se ka don a fɛ. A ye Musa bila o segi kɔnɔ, ka o segi ta ka taa o bila baji la, bin janmanjanw cɛma. O baji tɔgɔ ye ko Nil. A y’a fɔ Mariyama ye, ni o ye Musa kɔrɔmuso ye, ko a kana a yɔrɔ janya den na, walisa a ka se k’a dɔn fɛn min bɛna kɛ Musa la.

Sɔɔni dɔrɔn o kɔfɛ, Faraon denmuso nana a ko baji la. A sinna ka segi dɔ ye bin janmanjanw cɛma. A y’a fɔ a ka jɔndennin dɔ ye ko: ‘Taa segi ta ka na ni a ye.’ Faraon denmuso ye segi dayɛlɛ tuma min na a ye dakabanaden dɔ ye a kɔnɔ, min tun bɛ ka kasi Musa denyɛninnama tun don. Musa hinɛ donna Faraon denmuso la. A tun t’a fɛ Musa ka faga.

Mariyama y’i gɛrɛ Faraon denmuso la. I ɲɛ bɛ a la yan ja la wa? A y’a fɔ Faraon denmuso ye ko: ‘Yala ne bɛ se ka taa muso dɔ wele Israɛlkaw cɛma, min bɛna sin di den ma wa?’

Faraon denmuso ko: ‘Taa a wele ka na.’

Mariyama bolila ka taa o fɔ a ba ye. Musa woloba nana tuma min na, Faraon denmuso y’a fɔ a ye ko: ‘Den ta i ka taa sin di a ma. Ne na i sara.’

Musa woloba ye a den ta o cogo de la, ka a mago don a la. Kɔfɛ, Musa kɔrɔbayara dɔɔnin tuma min na, Musa woloba nana a di Faraon denmuso ma. Faraon denmuso y’a ta k’a kɛ a denkɛ ye. Musa lamɔna o cogo de la Faraon ka so kɔnɔ.

Ekisode 2:​1-10.