TALA mwana-kemba kanalila, nawa kanakwata ku munwe wa mwana-pwo. Jina Iienyi Mose. Yena unanyingika mwana-pwo au mupema chize? Iye kali mwana wa mwata wa mu A-Engitu, mwana wa pwo wa Falau.

Naye ya Mose yasweka Mose ndo muze iye akumbanyishine tukweji atatu, mumu iye kakazangile ngwo A-Engitu amushehe. Alioze iye te kananyingika ngwo Mose mahasa kumuwana, kashika iye anakalinga chimwe chuma hanga amulamwine.

Iye yanda umwe mutonga yaululieka kanawa hanga uchine kunjila meya. Mwenamo iye anakasa Mose, nawa yasa mutonga wacho ha yambu yisuku-yisuku ya mu Lwiji Nilu. Ndumbu ya Mose wa pwo, Miriame, yaswama hakamwihi hanga atale yize te muyipwa ko.

Mwana wa pwo wa Falau yapalumuka ku Lwiji Nilu hanga asane meya. Hohene iye yamona mutonga ha yambu. Yasanyika umwe kavumbi kenyi wa pwo yamwamba ngwenyi: ‘Yako hanga ungwanjile mutonga auze.’ Muze mwana wa mwata yafukula mutonga, yawanamo umwe mwana mupema! Mwana kemba Mose te kanalila, nawa mwana wa mwata yamuvwila keke yinji. Iye kakazangile ngwo Mose afwe.

Hohene Miriame yasoloka. Yena muhasa kumumona ha chizulie chino. Miriame yahula mwana wa pwo wa Falau ngwenyi: ‘Unazange hanga yami nguye ngukufupile umwe pwo Ka-Izalele hanga akulelele mwana?’

Mwana wa mwata yamba ngwenyi: ‘Mba ngunazange.’

Mba Miriame yazomboka fuji jinji hanga alweze naye. Muze naye ya Mose yaheta, mwana wa mwata yamba ngwenyi: ‘Mbata mwana au ungulelele yo, nawa Yami mungupwa ni kukufweta.’

Chocho naye ya Mose yalela mwanenyi. Muze Mose te hakola ndambu, yamutwala kuli mwana wa pwo wa Falau hanga amulele ngwe mwanenyi. Chenacho che chinakapwa mba Mose yakolela ku zuwo lia Falau.