BE DAGGE we goe yaagwa goo gine agganiggi bomaidi. We goe nuga Moisés. ¿Be wisi we yaagwa yeerdaglegedi doawa? Egipto rey e sisgwa, Faraón e sisgwa sunnadi.

Moisés nan goe oduggusa nii warbaa wilub, mer Egipto dorgan we goe oburgwemalaga. Auggine e nan wisinad sun nabir Moisés amismalale, degsoggu bendaggegala weyob imasa.

Garba ise sobale imasa mer egi dii dogega. Sorbali aa yagine Moisés mesisa geb we garba gagan maddusurmalad inbabali nasisa Nilo diwar gagga gine. Geb e bun Míriamye nugad gala sogsa, mer egi banguoye daggegala igi gudodibeye.

Sanar gussuli Faraón e sisgwa Nilo diwarse obnoniggi. Geb uggiar gaganmar inbabali garba nai daggali. Geb e gala arbaed wargwen gala sogsa: ‘We garba be anga sunae’. Geb rey e sisgwa garba egaargua, ¡goe yeerdagleged mai daggali! Goe Moisés ogormagmaina, geb rey sisgwa wile goe daggali. Egipto rey sisgwa we goe oburgwed abessuli.

Degid gine Míriam nonimoga. Be daggena bia Míriam gwissi sobarnaid gine. Míriam, Faraón e sisgwa sega egissa: ‘¿Israel gined ome be gala goe aggweg an aminae?’.

‘Eye be anga aminae,’ rey e sisgwa abinsogsa.

Degsoggua Míriam abarmade e nanga sogegala. Moisés e nan nonigua, rey e sisgwa ega sogsa: ‘We goe be sede geb be anga odummogo, aa ular an be bennuggoed’.

Degsoggu Moisés e nan agga na e mimmi aggwisad. Sorbali, Moisés nuegwad dumgusgua, gannar Faraón e sisgwa sega sesad, geb we na susad, e massi yobi na imasad. Agala Faraón neg yagine Moisés dunguali.